Исроил армияси Ғазо сектори марказидаги Нусейрат қочқинлар лагерида Ал-Қудс ал-Явм (alqudstoday-tv) телеканалининг машинасини портлатиб юбориши оқибатида беш нафар оммавий ахборот воситалари ходими ҳалок бўлди.
Ғазо ҳукумати матбуот хизмати маълумотларига кўра, ҳалок бўлганларнинг барчаси телеканал ходимлари – оператор Эймен ал-Жедий, журналистлар Файсал Абу ал-Қумсан, Иброҳим ал-Шайх Али, Муҳаммад ал-Лед ва Фади Хасунлардир. Машинадан жонли эфир учун фойдаланилган.
Ҳисоботга кўра, Ғазо секторида Исроил томонидан ўлдирилган оммавий ахборот воситалари ходимлари сони 201 нафарга етди. Ғазо ҳукумати ОАВ ходимларига қилинган ҳужум, қотиллик ва суиқасдларни кескин қоралади.
Баёнотда Халқаро журналистлар федерацияси, Араб журналистлар федерацияси ва бутун дунёдан журналист ташкилотлари Ғазо секторида фаластинлик журналистлар ва ОАВ ходимларига нисбатан содир этилган тизимли жиноятларни қоралашга чақирилди.
“Исроил ва геноцид жиноятида иштирок этаётган АҚШ, Буюк Британия, Германия, Франция каби давлатлар ушбу жирканч ҳамда шафқатсиз жиноятни содир этганлик учун тўлиқ жавобгардир”, дейилади баёнотда.
Ғазо ҳукумати бутун дунёдаги журналистика ва ОАВ фаолияти билан боғлиқ халқаро ҳамжамият, халқаро ташкилотларни Исроилнинг жиноятларини қоралашга, уни тўхтатиш чораларини кўришга ҳамда давом этаётган жиноятлари учун халқаро судларда жавобгарликка тортишга чақирди.
Матнда, шунингдек, Исроилга геноцид жиноятини тўхтатиш, Фаластин ва хусусан Ғазодаги журналистлар ва ОАВ ходимларини ҳимоя қилиш ҳамда уларни ўлдириш жиноятини тўхтатиш учун жиддий ва самарали босим ўтказиш талаб қилинади.
Изоҳ (0)