“Дарё” нашри 27 январда Ўзбекистон ва жаҳонда содир бўлган энг муҳим воқеаларни эътиборингизга ҳавола этади.
АҚШ “Вагнер”ни трансмиллий жиноий ташкилот деб эълон қилди ва унга алоқадор Россия, Хитой ва Бирлашган Араб Амирликлари компанияларига санкциялар киритди.
АҚШ Молия вазирлиги “Вагнер” хусусий ҳарбий компаниясини трансмиллий жиноий ташкилот деб эълон қилди. Бу ҳақда вазирлик сайтида хабар берилди.
АҚШ Молия вазирлиги, шунингдек, “Вагнер”га алоқадор бўлган Россия, Хитой, Люксембург ва Бирлашган Араб Амирликлари компанияларига ҳам санкциялар киритди. Хусусан, Хитойнинг Spacety China компанияси санкциялар остида қолди — АҚШ маълумотларига кўра, у Украинанинг сунъий йўлдошдан олинган суратларини “Вагнер”га сотган.
АҚШ Молия вазирлигининг санкциялар рўйхатига, жумладан, Россия саноат ва савдо вазирлиги раҳбари Денис Мантуров, Tataристон раҳбари Рустам Минниханов ва Россия ҳарбий-саноат мажмуасининг бир қатор компаниялари киритилган.
Уруш бошланганидан буён “Вагнер” жангчилари Украинадаги жанговар ҳаракатларда фаол иштирок этмоқда, лекин улар расмий равишда РФ Мудофаа вазирлигига ҳисобот бермайди.
Фаластин Исроил билан хавфсизликни мувофиқлаштириш режимини тўхтатди сабаб ва кутилмалар
Исроил мудофаа кучлари (ИМК) 27 январга ўтар кечаси Ғазо секторидан мамлакат ҳудудига учта ракета учирилганини маълум қилди. Ракеталарга жавобан Исроил ҳам Ғазога авиазарба йўллаган ва HAMASнинг ракета ишлаб чиқарувчи ерости иншоотини йўқ қилган.
“Ғазо секторида содир бўлаётган воқеалар учун HAMAS террорчилик ташкилоти жавобгар, айнан улар Исроил давлати хавфсизлигини бузганлик учун товон тўламоқда”, — дейилади ИМКнинг Twitterъдаги хабарида.
ОАВ хабарларига кўра, Ғазодан отилган ракеталар Иордан дарёсининг ғарбий соҳилидаги Женин қочқинлар лагерида ИМК операцияси пайтида тўққиз нафар фаластинликнинг ўлдирилишига жавоб бўлди.
Алжазеера ва Фаластиннинг WAFA ахборот агентлиги маълумотларига кўра, 26 январь куни эрталаб Исроил ҳарбийлари Женинга кирган. У ерда снайперлар томлардаги позицияларни эгаллаб, шиддатли тўқнашувларни келтириб чиқарган, аскарлар эса Исроил хавфсизлик кучлари йўлини тўсмоқчи бўлган ёш фаластинликларга қарата ўт очган. WAFA маълумотларига кўра, Исроил армияси қочқинлар лагеридаги электр таъминотини узиб қўйган ва у ерга тиббиёт ходимлари ёки журналистларнинг киришига рухсат бермаган.
Фаластин раҳбарияти Жениндаги отишмадан кейин Исроил билан хавфсизликни мувофиқлаштириш режими тўхтатилганини эълон қилди. Jerusalam Post Фаластин шунга ўхшаш қарорни 2020 йилда ҳам эълон қилгани, аммо беш ойдан кейин ундан воз кечганини ёзди.
Айни пайтда Фаластин раҳбарияти Бирлашган Миллатлар Ташкилоти Хавфсизлик Кенгашига мурожаат йўллашга қарор қилган.
Украинага жанговар самолётлар етказиб берилиш шартлари айтилди
Ғарб давлатлари Киевга танклар етказиб берилиши ҳақида эълон қилгач, Украина президенти ғарбдан узоқ масофага учувчи ракеталар ва жанговар самолётлар олишни ҳам кутаётганини айтди. Politico нашри хабар беришича, Ғарб ҳарбий амалдорлари бу масалани муҳокама қилмоқда.
Хусусан, Париж Киевга қирувчилар етказиб беришни истисно қилмайди, аммо бу ҳаракат урушнинг кучайишига олиб келмаслиги, шунингдек, Европа хусусан, Франциянинг хавфсизлигига зарар етказмаслиги шарт. Бу ҳақда Франция Миллий ассамблеясининг Миллий мудофаа ва Қуролли кучлар қўмитаси раҳбари Томас Гасиллуд маълум қилди.
“Ҳар бир аниқ вазият бўйича сўровларни кўриб чиқишимиз ва барча эшикларни очиқ қолдиришимиз керак. Буёғига нима бўлишини яқин ҳафталарда кўрамиз, чунки ишлар тез суръатда давом этмоқда”, — дея тушунтирди франциялик амалдор.
Шунингдек, у Франция Украинага ўзининг Leclerc танкларини етказиб бериши даргумонлигини таъкидлади, чунки улар Киевга берилиши эълон қилинган Америка ва Германия танклари билан “мос тушмайди”.
Ўзбекистон—Қирғизистон ҳамкорлигида қайси йўналишларга алоҳида эътибор қаратилди
Шавкат Мирзиёев ва Садир Жапаров тор доирадаги музокараларни икки мамлакат расмий делегациялари аъзолари, қатор вазирлик ва вилоятлари раҳбарлари иштирокида кенгайтирилган таркибда давом эттириб, ҳамкорлик йўналишларни белгилади.
Музокарада саноат кооперацияси доирасида қарийб 500 миллион долларлик янги инвестиция лойиҳаларини ишлаб чиқиш таклиф қилинди. Автомобиллар, замонавий маиший техника, қурилиш материалларини ишлаб чиқариш, фойдали қазилмаларни биргаликда қазиб олиш ва қайта ишлаш шулар жумласидан.
Интенсив боғлар ва иссиқхона хўжаликларини ривожлантириш, мева-сабзавот ва чорвачилик маҳсулотларини етказиш, етиштириш каби агрокооперация дастурини амалга ошириш белгиланди.
Транспорт ва логистика соҳасида: Хитой—Қирғизистон—Ўзбекистон темир йўлини қуриш ишларини фаоллаштириш, Андижон—Ўш—Иркиштом автомобиль йўлини тўлиқ ишга тушириш мақсадида қўшма транспорт-логистика компаниясини ташкил этишга келишилди.
Музокараларда энергетика соҳасидаги ҳамкорликка алоҳида эътибор қаратилди. Гидроэнергетикадаги лойиҳаларни амалга ошириш, шу жумладан Қамбарота ГЭС-1 қурилиши борасида биргаликдаги саъй-ҳаракатларни тезлаштириш зарурлиги қайд этилди.
Изоҳ (0)