Исроил мудофаа кучлари (ИМК) 27 январга ўтар кечаси Ғазо секторидан мамлакат ҳудудига учта ракета учирилганини маълум қилди. Исроилнинг “Темир гумбаз” ҳаво ҳужумидан мудофаа тизимлари Ашкелон йўналишида отилган ракеталардан бирини тутиб олган. Иккинчи ракета Исроилдаги очиқ майдонга, учинчиси чегара йўлагига қулаган.
ИМК хабар беришича, ракеталарга жавобан Исроил ҳам Ғазога авиазарба йўллаган ва HAMASнинг ракета ишлаб чиқарувчи ерости иншоотини йўқ қилган.
תיעוד תקיפת האתר התת-קרקעי לייצור רקטות: pic.twitter.com/mdRSpiTvAl
— צבא ההגנה לישראל (@idfonline) January 27, 2023
“Ғазо секторида содир бўлаётган воқеалар учун HAMAS террорчилик ташкилоти жавобгар, айнан улар Исроил давлати хавфсизлигини бузганлик учун товон тўламоқда”, — дейилади ИМКнинг Twitter’даги хабарида.
ОАВ хабарларига кўра, Ғазодан отилган ракеталар Иордан дарёсининг ғарбий соҳилидаги Женин қочқинлар лагерида ИМК операцияси пайтида тўққиз нафар фаластинликнинг ўлдирилишига жавоб бўлди.
Al Jazeera ва Фаластиннинг WAFA ахборот агентлиги Исроил армиясининг операцияси чоғида тўққиз фаластинлик ҳалок бўлгани, яна 20 нафари яралангани ҳақида ёзганди. Қурбонлар орасида 60 ёшли аёл ҳам бор.
WAFA’нинг ёзишича, 26 январь куни эрталаб Исроил ҳарбийлари Женинга кирган. У ерда снайперлар томлардаги позицияларни эгаллаб, шиддатли тўқнашувларни келтириб чиқарган, аскарлар эса Исроил хавфсизлик кучлари йўлини тўсмоқчи бўлган ёш фаластинликларга қарата ўт очган. WAFA маълумотларига кўра, Исроил армияси қочқинлар лагеридаги электр таъминотини узиб қўйган ва у ерга тиббиёт ходимлари ёки журналистларнинг киришига рухсат бермаган.
Фаластин раҳбарияти Жениндаги отишмадан кейин Исроил билан хавфсизликни мувофиқлаштириш режими тўхтатилганини эълон қилди. Жерусалем Фаластин шунга ўхшаш қарорни 2020 йилда ҳам эълон қилгани, аммо беш ойдан кейин ундан воз кечганини ёзди.
Фаластин раҳбарияти, шунингдек, Бирлашган Миллатлар Ташкилоти Хавфсизлик Кенгашига мурожаат йўллашга қарор қилди.
Изоҳ (0)