Исроил ташқи разведка хизмати (Моссад) раҳбари Давид Барнеа мамлакат ҳарбий маҳкамасига ҲАМАС билан потенциал келишув режасини тақдим этди. Бу ҳақда “РИА Новости” хабар берди.
Келишувнинг биринчи босқичи 35 кунлик оташкесим эвазига гаровга олинган 35 нафар аёл, касал, ярадор ва қарияларни озод қилишни назарда тутади. Шундан сўнг келишув яна бир ҳафтага узайтирилиши мумкин, бу гаровга олинганларни озод қилишнинг иккинчи босқичи бўйича музокаралар ўтказишга имкон беради. Озод қилинадиганлар қаторида фуқаролик мудофааси ходимлари, исроиллик аскарлар бўлиши кутилмоқда.
Таъкидланишича, Исроил гаровга олинганлар эвазига қамоқдан озод қилиши керак бўлган фаластинлик маҳбуслар сони ҳали аниқланмаган. Бу масалада яҳудий давлатини уларнинг миқдори эмас, сифати қизиқтираётгани таъкидланади. ҲАМАС оғир жиноят содир этган маҳбусларни топширишни талаб қилмоқда.
Январь ойи охирида Исроил, АҚШ, Миср ва Қатар вакиллари Парижда Ғазо секторидаги гаровга олинганларни босқичма-босқич озод қилиш бўйича янги келишув асосида келишиб олди. Анклавдаги ҳукмрон ҲАМАС ҳаракати сулҳ таклифи олгани ва уни ўрганаётганини айтди.
Изоҳ (0)