Isroil armiyasi G‘azo sektori markazidagi Nuseyrat qochqinlar lagerida Al-Quds al-Yavm (alqudstoday-tv) telekanalining mashinasini portlatib yuborishi oqibatida besh nafar ommaviy axborot vositalari xodimi halok bo‘ldi.
G‘azo hukumati matbuot xizmati ma’lumotlariga ko‘ra, halok bo‘lganlarning barchasi telekanal xodimlari – operator Eymen al-Jediy, jurnalistlar Faysal Abu al-Qumsan, Ibrohim al-Shayx Ali, Muhammad al-Led va Fadi Xasunlardir. Mashinadan jonli efir uchun foydalanilgan.
Hisobotga ko‘ra, G‘azo sektorida Isroil tomonidan o‘ldirilgan ommaviy axborot vositalari xodimlari soni 201 nafarga yetdi. G‘azo hukumati OAV xodimlariga qilingan hujum, qotillik va suiqasdlarni keskin qoraladi.
Bayonotda Xalqaro jurnalistlar federatsiyasi, Arab jurnalistlar federatsiyasi va butun dunyodan jurnalist tashkilotlari G‘azo sektorida falastinlik jurnalistlar va OAV xodimlariga nisbatan sodir etilgan tizimli jinoyatlarni qoralashga chaqirildi.
“Isroil va genotsid jinoyatida ishtirok etayotgan AQSH, Buyuk Britaniya, Germaniya, Fransiya kabi davlatlar ushbu jirkanch hamda shafqatsiz jinoyatni sodir etganlik uchun to‘liq javobgardir”, deyiladi bayonotda.
G‘azo hukumati butun dunyodagi jurnalistika va OAV faoliyati bilan bog‘liq xalqaro hamjamiyat, xalqaro tashkilotlarni Isroilning jinoyatlarini qoralashga, uni to‘xtatish choralarini ko‘rishga hamda davom etayotgan jinoyatlari uchun xalqaro sudlarda javobgarlikka tortishga chaqirdi.
Matnda, shuningdek, Isroilga genotsid jinoyatini to‘xtatish, Falastin va xususan G‘azodagi jurnalistlar va OAV xodimlarini himoya qilish hamda ularni o‘ldirish jinoyatini to‘xtatish uchun jiddiy va samarali bosim o‘tkazish talab qilinadi.
Izoh (0)