Халқаро журналистлар федерацияси ОАВ қурбонлари бўйича йиллик ҳисоботида 2023 йилда 94 нафар журналист ўлдирилгани ва яна 400 га яқин журналист қамоққа олинганини маълум қилди. Бу ҳақда Associated Press хабар берди.
Ташкилот 2023 йилда бутун дунё бўйлаб ўз ишларини бажараётиб ҳалок бўлган оммавий ахборот воситалари ходимлари сонидан чуқур хавотир билдирди, чунки Исроилнинг ҲАМАС билан уруши 30 йилдан ортиқ давом этган бошқа тўқнашувларга қараганда кўпроқ журналист ҳаётига зомин бўлди. Халқаро журналистлар федерацияси ОАВ ходимларининг ҳимоясини яхшилаш ва айбдорларни жавобгарликка тортишга чақирмоқда.
“Журналистларни ҳимоя қилиш ва самарали халқаро ҳуқуқни қўллаш учун янги глобал стандартга бўлган асосий эҳтиёж ҳеч қачон бу даражада юқори бўлмаган”, — деди федерация президенти Доминик Прадали.
Таъкидланишича, ҲАМАС 7 октябрь куни Исроилга ҳужум қилганидан бери Исроил ва жангчилар ўртасидаги урушни ёритган 68 нафар журналист ҳалок бўлган. Бу бутун дунё бўйлаб ОАВ қурбонларининг 72 фоизини ташкил қилади. Уларнинг катта қисми Ғазо секторидаги фаластинлик журналистлардир. Таққослаш учун: бу йил Украинадаги урушда уч мухбир ҳалок бўлди.
Изоҳ (0)