Ҳиндистон давлат нефтни қайта ишлаш компаниялари Россия ёқилғисидан воз кечиб, Яқин Шарқ хом ашёсига ўтиши мумкин.
Reuters ахборот агентлиги нефтни қайта ишлаш соҳасидаги учта манбага таяниб хабар беришича, бунга сабаб Россиядан етказиб беришнинг етишмовчилиги бўлган.
Ҳиндистоннинг йирик нефтни қайта ишлаш корхоналари — Indian Oil Corp, Bharat Petroleum Corp va Hindustan Petroleum январь ойида ўз қувватларини тўлдириш учун 8 миллиондан 10 миллион баррелгача нефть тақчиллигига дуч келган, чунки уларнинг асосий рус таъминотчисидан спот етказиб бериш ҳажми камайган.
Reuters’нинг аниқлик киритишича, компаниялар Россиядаги ички талабнинг ўсиши, шунингдек, Россиянинг ОПЕК+ давлатлари олдидаги мажбуриятларини бажариш зарурати туфайли кейинги ойларда ҳам рус нефтини импорт қилишда қийинчиликлар бўлишидан хавотирда. Нефть экспорт қилувчи мамлакатлар ташкилоти Россиядан нефть қазиб олишни камайтиришни, шунингдек, илгари квоталардан ошиб кетган миқдорни қоплашни талаб қилмоқда.
Икки манбанинг нашрга маълум қилишича, уларнинг компанияси Яқин Шарқ таъминотчиларидан узоқ муддатли шартномалар доирасидаги қўшимча ҳажмда хом ашё олиши ёки юқори олтингугуртли нефть учун спот-тендер эълон қилиши мумкин. Шунингдек, суҳбатдошлар компаниялар март ойида хом ашёни қайта ишлаш учун ички нефть захираларидан фойдаланиши мумкинлигини қўшимча қилган.
Изоҳ (0)