Самарқанд вилоятининг Пайариқ, Ургут ва Тойлоқ туманларига янги ҳокимлар тайинланди. Бу ҳақда 5 август куни вилоят ҳокимлиги хабар берди.
Маълум қилинишича, Халқ депутатлари уч туман кенгашларининг навбатдан ташқари сессиялари ўтказилган. Дастлабки сессияда Исроил Жабборов бошқа ишга ўтиши муносабати билан ўз аризасига кўра Пайариқ тумани ҳокими вазифасидан озод этилгани билдирилган.
Шу пайтгача Самарқанд вилояти ҳокимининг қишлоқ ва сув хўжалиги масалалари бўйича ўринбосари лавозимида фаолият кўрсатган Шунқор Худойбердиев мазкур туман ҳокими этиб тайинланган.
Баҳодир Бобоназаров ўз аризасига кўра Тойлоқ тумани ҳокими вазифасидан олинган. Унинг ўрнига Беҳзод Раҳматуллаев Тойлоқ тумани ҳокими этиб тайинланди.
Раҳматуллаев тайинловга қадар Самарқанд вилояти ҳокимлиги Ташкилий-кадрлар гуруҳи раҳбари вазифасида фаолият юритган.
Шу билан бирга, Ургут тумани ҳокими ҳам ўзгартирилган. Туман ҳокими Ботир Жабборов бошқа ишга ўтиши муносабати билан ўз вазифасидан озод этилган. Ўрнига Дилмурод Сайидқулов Ургут тумани ҳокими этиб тайинланган.
Сайидқулов тайинловга қадар Самарқанд вилоят прокурори ўринбосари вазифасида ишлаган.
Аввалроқ жорий йил 5 августида Самарқанд вилояти ҳокимининг тўрт ўринбосари ўзгаргани хабар қилинганди.
Изоҳ (0)