АҚШ президенти Дональд Трампнинг сўнгги пайтларда оммавий чиқишларида билдирган ғалати баёнотлари когнитив муаммолар белгиси бўлиши мумкин. Бу экспертларга таяниб, ҳақда The Guardian газетаси ёзмоқда.
Корнелл университети психология кафедраси ва Вейл Корнелл тиббиёт маркази психиатрия кафедрасининг катта ўқитувчиси Гарри Сигалнинг айтишича, суҳбат мавзуларининг кескин ўзгариши Трампнинг “ўйламай чалғиши”га мисол бўлади.
“У шунчаки ўзини назорат қилмай ва изчил фикр юритмасдан мавзуларни ўзгартиради”, дейди Гарри Сигал.
Мутахассиснинг фикрича, 79 ёшли Трампнинг когнитив қобилиятидаги ўзгаришдан далолат берувчи яна бир хусусият - унинг конфабуляцияларга мойиллигидир.
“Бу ғояни ёки аллақачон содир бўлган воқеани олиб, унга ҳали бўлмаган нарсани қўшишдир”, деб тушунтиради Сигал.
Эксперт Трампнинг амакиси почта орқали бомбалар жўнатган америкалик математик Теодор Качинский - Унабомбер билан таниш бўлгани ҳақидаги нотўғри баёнотини тилга олган. Трампнинг айтишича, унинг амакиси, профессор Жон Трамп Качинскийга Массачусетс технология институтида дарс берган.
The Guardian тушунтиришича, Трампнинг амакиси 1985 йилда вафот этган, Качинский эса биринчи марта 1996 йилда ўз лақаби билан омма олдида тилга олинган. Бундан ташқари, Качинский Массачусетс технология институтида таҳсил олмаган.
“Ҳикоя мутлақо маъносиз, аммо жуда самимий ва таъсирли тарзда сўзланмоқда, гўё у буни эслаётгандек”, дейди эксперт.
Мутахассислар Трампнинг кундалик нутқида мавзуларни кескин ўзгартирган ҳолатларга ҳам эътибор қаратишган. Нашрнинг қайд этишича, АҚШ президенти сайловолди ваъдаларининг бажарилиши ҳақида гапирар экан, тўсатдан уйларни сув билан таъминлаш мавзусига ўтиб, шахсий афзалликлари ҳақида гапирган.
The Guardian ёзишича, Техасдаги тошқин оқибатлари, Украина ва Ғазо секторидаги вазият, Эронга берилган зарбалар ва божларни муҳокама қилиш учун чақирилган ҳукумат йиғилишида Трамп вазирлар маҳкамаси мажлислар залини қандай безатгани ҳақида 13 дақиқалик монолог сўзлаган.
Шунингдек, нашрда психолог ва ёзувчи, 28 йил давомида Жонс Хопкинс университети тиббиёт мактабида психиатрия кафедраси доценти бўлиб ишлаган Жон Гартнернинг баҳоси келтирилган.
“Биз кўраётганимиз - деменциянинг классик белгилари, яъни инсоннинг дастлабки ҳолати ва функцияларининг кескин ёмонлашуви. Бундан кейин аҳвол фақат ёмонлашади. Бу менинг башоратим”, деган у.
АҚШ президенти ўзининг соғлом эканини бир неча бор таъкидлаган ва ўзидан олдинги президент Жо Байденнинг когнитив муаммоларига ишора қилган. У собиқ президентга, жумладан, сайловолди пойгаси пайтида когнитив тестларни топшириш ва натижаларни таққослашни таклиф этган.
Изоҳ (0)