Европа Иттифоқи дипломатияси раҳбари Жозеп Боррел Еврокомиссия билан биргаликда 15 ноябрь куни Украинага нисбатан босқинчилик учун Россияга қарши санкцияларнинг 12-пакети бўйича таклифларни тақдим этишни режалаштирмоқда.
“Биз санкцияларнинг 12-пакети устидаги ишларни ниҳоясига етказмоқдамиз. Ушбу чораларнинг бир қисми шахсий санкциялар, иккинчи қисми — иқтисодий ва тармоқ санкциялардир. Чоршанба куни комиссия билан биргаликда мен ўз таклифларимни кенгашга тақдим этаман”, — дейди Боррел матбуот анжуманида.
Бундан ташқари, у таклиф этилаётган санкциялар “рўйхатга қўшимча шахсларни қўшиш, Россия экспортига янги тақиқлар, жумладан, олмос сотиб олишни тақиқлаш, Россия нефти нархининг юқори чегарасига риоя қилишни кучайтириш бўйича ҳаракатлар, шунингдек, санкциялардан қочишга қарши кураш чоралари”ни қамраб олишини айтди.
Аввалроқ Bloomberg агентлиги Евроиттифоқ Россияга қарши янги санкциялар рўйхатига кимёвий моддалар ва технологиялар экспортини тақиқлашни киритаётгани маълум қилганди. Бу каби чоралар Россия билан тахминан 5 миллиард евролик савдоларга таъсир кўрсатади.
Европа Иттифоқи аввалги санкциялар пакетини 2023 йил июнь ойида қабул қилган эди. Ўшанда Россиянинг ахборот хавфсизлиги соҳасидаги энг йирик компанияларидан бири Positive Technologies санкциялар остида қолганди. Донецк, Луганск, Запорожье ва Херсон вилоятларида иш бошлаган “Звезда” телерадиокомпанияси, Халқаро ҳисоб-китоб банки ва ЦМРБанк ҳам санкция рўйхатига киритилган.
Изоҳ (0)