Қирғизистон иқтисодий ўсиш бўйича Марказий Осиёда етакчига айланди

Жорий йил I ярмида минтақада Қирғизистон иқтисодий ўсиши энг юқори суръат касб этди.

Олти ой мобайнида Қирғизистон ялпи ички маҳсулоти 11,7 фоизга ўсган. Бу Марказий Осиё мамлакатлари орасида энг юқори кўрсаткич. 

Иқтисодий ўсиш бўйича иккинчи ўринни Тожикистон банд этган — 8,1 фоиз. Учинчи ўринга Ўзбекистон тўғри келади. Мамлакат ялпи ички маҳсулоти 2025 йил I ярмида 7,2 фоиз кўпайди.

Ўз ўрнида Туркманистон иқтисодий ўсиши 6,3 фоизни, Қозоғистонники 6,2 фоизни ташкил этган.

Қирғизистон иқтисодий ўсиш суръати бўйича ҳам минтақада етакчи бўлган. Мамлакат ялпи ички маҳсулоти 2024 йил мос давридагига қараганда 3,6 фоиз бандга тезлашган. Кейинги ўринни Қозоғистон эгаллаган. Республикада ялпи ички маҳсулот ҳажми ортиш суръати олти ойда 3 фоиз бандга тезлашган. Тожикистонда иқтисодий ўсиш 1,9 фоиз бандга, Ўзбекистонда 0,6 фоиз бандга тезлашган.

Бироқ минтақада Қозоғистон энг йирик иқтисодиётга эга. 2024 йилда мамлакат ялпи ички маҳсулоти қарийб 288 миллиард долларни ташкил этган. Бу аҳоли жон бошига 14 минг доллардан кўпроққа тўғри келади. Кейинги ўринни Ўзбекистон иқтисодиёти эгаллайди. Ўтган йили республика ялпи ички маҳсулоти ҳажми 115 миллиард долларга баҳоланган. Бу миқдор аҳоли жон бошига 3 минг 92 доллардан тўғри келади.

Маълумот учун, Ўзбекистон жорий йил I ярмида Қозоғистон билан энг кўп савдо қилган — 2,2 миллиард доллар. Шу билан бирга, мамлакат билан Туркманистон 464,1 миллион долларлик, Қирғизистон 430,2 миллион долларлик, Тожикистон 322,3 миллионлик товар ва хизматлар олди-сотди қилган.