Россия ёқилғисини Европага етказиб беришда Ҳиндистоннинг роли ортмоқда — Bloomberg

5 февралдан бошлаб Россия нефть маҳсулотларини импорт қилиш бўйича Европа эмбаргосининг кучга кириши дизель ёқилғисини етказиб беришнинг глобал йўналишларини сезиларли даражада ўзгартиради. Бу ҳақда Bloomberg маълумот бермоқда.

Маълумотларга кўра, бунга Россиянинг янги нефть харидорлари ёрдам беради. Улар хом ашёни қайта ишлагач, уни Европага қайтариб юборади.

Бундай харидорларга Украинада уруш бошланганидан кейин Россия нефтининг чегирмали энг йирик харидорларидан бирига айланган Ҳиндистон ҳам киради.

Vortexa таҳлилчиларининг фикрига кўра, 2022 йил декабрь ойида Россия бу мамлакатга бир ой олдингига қараганда 24 фоизга кўпроқ хом нефть етказиб берган ва уни асосан хусусий нефтни қайта ишлаш заводлари сотиб олган.

Шу билан бирга, Ҳиндистон ва АҚШ Европа Иттифоқига дизель етказиб бериш ҳажмини оширди, чунки улар истеъмол қилганидан кўпроқ ёнилғи ишлаб чиқармоқда.

Ҳиндистондан экспортнинг ортиши «Россия нефти Европага сотилмасдан олдин Ҳиндистонга йўналтирилади ва дизель ёқилғисига қайта ишланади» деган маънони англатади.

Bloomberg қайд этишича, бу ЕИ санкцияларини бузмайди, бироқ чекловчи чоралар самарасизлигини кўрсатади. Аслини олганда, бу жараёнда нефть маҳсулотлари «одатдагидан минглаб километр узоқроққа, кейин эса орқага ташилади».

Маълумотларга кўра, бунда юкларни қайта чиқариш ёки ёнилғини Россияга тегишли бўлмаган нефть маҳсулотлари билан аралаштириш каби «кўпроқ шубҳали битимлар» хавфи бор.

Украинада уруш бошланишидан олдин Россия Европага энг йирик ёқилғи етказиб берувчи бўлган.

Эндиликда унинг асосий харидорлари Африка, Лотин Америкаси ва Осиёдан келган трейдерлар бўлади. ЕИ Россия экспортининг ўрнини босиш учун кунига 600 минг баррелгача дизель ёқилғиси сотиб олишни таъминлаши керак.

Аввалроқ Bloomberg Яқин Шарқ мамлакатларини ЕИ ва Буюк Британияга ёқилғи етказиб беришнинг энг аниқ янги манбаи деб атаган. Бундан ташқари, Хитой дизель экспортини оширмоқда.