Европа Иттифоқининг Россияга қарши санкцияларининг 12-пакетидан 30 дан ортиқ компаниялар, жумладан, Ўзбекистон, Қозоғистон ва Сингапур фирмалари, шунингдек, Россиянинг бир қанча инжиниринг компаниялари ўрин олиши мумкин, деб хабар беради Bloomberg.
Қайд этилишича, Евроиттифоқ Россияга қурол ишлаб чиқаришда қўлланиши мумкин бўлган станоклар ва улар учун эҳтиёт қисмлар экспортини тақиқлашни таклиф қилган. Санкциялар пакети, шунингдек, Россия олмосларини етказиб беришни тақиқлаш ва мамлакат нефти нархининг юқори чегарасига қўшимча чекловларни ҳам ўз ичига олади.
Таклифлар орасида Россияга кимёвий маҳсулотлар, литийли аккумуляторлар, термостатлар ва двигателлар, жумладан, дронлар етказиб беришни тақиқлаш киради. Мамлакатлар суюлтирилган пропан, қуйма темир ва шпигелейзен (темир-марганец қотишмаси), мис ва алюминий сим, фольга, қувурлар ҳамда арматура импортига чекловларни муҳокама қилади.
Олмосларни олиб киришни тақиқлаш 1 январдан кучга кириши мумкин, параллел равишда учинчи мамлакатларда қайта ишланган рус олмосларини олиб киришга босқичма-босқич билвосита тақиқ жорий этиш режалаштирилмоқда. G7 мамлакатлари (Буюк Британия, Канада, Франция, Германия, Италия, Япония ва АҚШ) ташқи ишлар вазирлари ўтган ҳафта Россия олмосларига чекловлар бўйича келишувга эриша олмаганди.
Санкциялар пакети лойиҳаси, шунингдек, россияликларга крипто-активлар учун ҳамёнлар, ҳисоблар ва сақлаш хизматларини тақдим этувчи Европа компанияларида лавозимларни эгаллашни тақиқлашни, Европадаги россияликлар ёки россиялик юридик шахсларга тегишли бўлган ёки назорат қилувчи компаниялардан Европа Иттифоқи ва бошқа мамлакатлардан маблағ ўтказиш учун рухсат сўрашни талаб қилишни ўз ичига олади.
Европа Иттифоқи аввалги санкциялар пакетини 2023 йил июнь ойида қабул қилган эди. Ўшанда Россиянинг ахборот хавфсизлиги соҳасидаги энг йирик компанияларидан бири Positive Technologies санкциялар остида қолганди. Донецк, Луганск, Запорожье ва Херсон вилоятларида иш бошлаган “Звезда” телерадиокомпанияси, Халқаро ҳисоб-китоб банки ва TsMRBank ҳам санкция рўйхатига киритилган.
Изоҳ (0)