Буюк Британия ўз санкцияларини четлаб ўтиб, Россиядан қайта ишланган нефтни рекорд миқдорда харид қилмоқда, деб ёзади The Guardian ҳукумат маълумотларига таяниб.
Нашрнинг таъкидлашича, Буюк Британия қонундаги “дарча” туфайли нефть сотиб олишда давом этмоқда, чунки агар Россия нефти бошқа давлатда қайта ишланса, у техник нуқтайи назардан энди Россияники ҳисобланмайди. Мисол учун, нашр “Десмог” янгиликлар сайтининг таҳлилига таяниб, Ҳиндистон, Хитой ва Туркиядан қайта ишланган нефть импорти 2023 йилда 2,2 миллиард фунт стерлингни ташкил этганини, бу ўтган йил учун рекорд кўрсаткич бўлганини таъкидлайди.
Global Witness ташкилоти (табиий ресурсларни қазиб олувчи давлатлар томонидан инсон ҳуқуқлари бузилишига қарши курашувчи ташкилот) ҳар йигирманчи авиарейс Россия ёнилғиси ёрдамида амалга оширилишини таъкидлайди. Ташкилот Россия Федерациясидан ташқарида тайёрланадиган ёнилғи санкцияларга учрамаслигини таъкидлайди. Global Witness буни “пул ювиш” деб атади.
“Россия нефтидан тайёрланган миллионлаб баррел ёнилғи Буюк Британияга оқиб келишда давом этмоқда. Биргина ўтган йилнинг ўзида бу келишув Кремлга 100 миллион фунт стерлингдан кўпроқ даромад келтирди”, — деди Global Witness катта терговчиси Лела Стенли.
Апрель ойида Ҳиндистон Россия нефти импортини ойига 19 фоизга ошириб, кунига 1,96 миллион баррелга етказди. Бу кўрсаткич тўққиз ой ичида энг юқори кўрсаткич бўлди.
Изоҳ (0)