Тошкент халқаро аэропортида Ўзбекистон орқали хорижга валюта маблағларини ноқонуний равишда олиб чиқиб кетишга уринган шахс тўхтатиб қолинди, деб хабар беради Давлат божхона қўмитаси.
Маълум қилинишича, ушбу фуқаронинг хатти-ҳаракатлари божхоначилар эътиборини тортган ва у ўрнатилган тартибда божхона кўригидан ўтказилган.
Натижада ушбу шахснинг юклари орасидаги тамаки қутиларида божхона ходимларига маълум қилинмаган ва декларацияда кўрсатилмаган, олиб чиқиш меъёридан ортиқ бўлган умумий қиймати 465 миллион сўм эквивалентидаги нақд хорижий валюталар, яъни 27,3 минг доллар ва 1,8 миллион рубль борлиги аниқланган.
Ҳозирда юқоридаги ҳолат юзасидан божхона органлари томонидан суриштирув ҳаракатлари давом эттирилмоқда.
Маълумот учун, қонунчиликка кўра 100 миллион сўмгача эквивалентдаги нақд хорижий валютани Ўзбекистон ҳеч қандай рухсатномасиз олиб чиқиш мумкин. Шунингдек, 70 миллион сўмгача бўлган эквивалентдаги маблағлар учун декларация талаб қилинмайди.
Аввалроқ Тошкент халқаро аэропортида 286 минг доллардан ортиқ пулни норин, кабоб, пахлава каби егуликлар орасига яшириб, божхонадан олиб ўтилишининг олди олингани ҳақида хабар берилган эди.
Изоҳ (0)