Москвада меҳнат муҳожирларини эмлаш ишлари бошланди. 27 июндан улар Сахарово қишлоғидаги миграция марказида, 29 июндан эса «Садовод» савдо маркази ёнидаги вакцинация пунктида эмланмоқда. Россия фуқаролигига эга бўлмаган кишиларни эмлаш қандай кетаётгани ҳақида «РБК» фоторепортаж тайёрлади.
Москвада меҳнат муҳожирларини эмлаш ҳозирча тажриба режимида бошланди. Шаҳарда айрим тоифадаги соҳа ходимларининг камида 60 фоизни эмлаш мажбурий қилинган. Ушбу соҳаларга умумий овқатланиш, савдо, транспорт, уй-жой коммунал хизматлари ва бошқалар киради. Иш берувчиларнинг сўровига биноан ходимлар бир компонентли «Спутник Лайт» вакцинаси билан эмланмоқда.
Мажбурий эмлаш меҳнат муҳожирларининг аксариятини ўз ичига олган қурилиш саноатига тааллуқли эмас. Коронавирус пандемияси ва шу билан боғлиқ чегараларнинг ёпилиши туфайли кўплаб меҳнат муҳожирлари 2020 йилда Россияни тарк этган, шунинг учун ўтган йилнинг кузига келиб қурилиш майдонларида ва уй-жой соҳасида ишчилар етишмай қолди.
Бош вазирнинг қурилиш соҳасини назорат қилувчи ўринбосари Марат Хуснуллиннинг айтишича, ҳукумат Россияга меҳнат муҳожирларини олиб кириш тартибини қандай соддалаштиришни кўриб чиқмоқда. Шу муносабат билан чет элликларни мажбурий эмлаш ҳам муҳокамадан ўтган. «Агар сиз Россияга ишлашга келсангиз, биз сизни эмлашга тайёрмиз. Биз бу ҳақда амалда ички келишувга эришдик, энди ишни янги регламент шаклида ташкил этишга ҳаракат қиляпмиз», — деди Хуснуллин.
Россиядаги чет эллик ишчиларни эмлаш пуллик. Вакцинация харажатларини иш берувчи тўлайди, шунингдек, у ходимнинг эмланганлик гувоҳномасини олади. Бир ходимни эмлаш нархи 1300 рубль (190 минг сўм)ни ташкил қилади.
Мавзуга доир: 1,5 млн долларлик мукофот, бепул пицца ва товуқ. Жаҳонда COVID-19’га қарши эмланганлар қандай рағбатлантирилмоқда?
Мигрантларнинг рўйхатлари Москва мериясига тақдим этилади. Уларда ходимнинг паспорт маълумотлари, унинг патенти, яшаш гувоҳномаси ёки Россияда вақтинча қолиш учун рухсатнома бўлиши керак. Арманистон, Беларусь, Қозоғистон ва Қирғизистон фуқаролари учун (Божхона иттифоқига киритилган) фақат паспорт маълумотларини тақдим этиш кифоя. Рўйхат топширилгандан сўнг ваколатли органлар эмлаш санаси ва вақтини белгилайди.
Меҳнат муҳожирлари учун Сахароводаги вакцинация пункти соат 09:00 дан 21:00 гача, «Садовод» савдо маркази ёнидагиси эса, соат 08:00 дан 20:00 гача ишлайди. Шу билан бирга шаҳар мерияси хабарига кўра, Сахароводаги эмлаш пункти очилган пайтда фақат икки шифокор ва 12 нафар ҳамшира ишлай бошлаган. «Садовод» яқинидаги эмлаш марказида уч шифокор ва 16 нафар ҳамшира мавжуд.
Тажриба режимида меҳнат муҳожирларини эмлаш тугагандан сўнг, мажбурий вакцинация бошқа хорижий гуруҳларга, шу жумладан ўз-ўзини иш билан таъминлайдиганларга ҳам қўлланилади.
Ички ишлар вазирлигининг маълумотларига кўра, 2021 йил январидан май ойигача 538,7 минг нафар чет элликларга ва Россия фуқаролигига эга бўлмаган кишиларга Россияда ишлаш учун патент берилган. 2020- йил худди шу даврда 585 минг киши патент олган эди.
«Спутник Лайт» вакцинаси 26 июндан бошлаб фуқаролик муомаласига кирди, Соғлиқни сақлаш вазирлиги раҳбари Михаил Мурашконинг сўзларига кўра, июль охиригача препаратнинг 2,5 миллион дозаси вакцинация учун тақдим этилади. Ҳукумат аллақачон 500 минг дозани сотиб олган, бу препаратдан қайта эмлаш учун ҳам фойдаланиш мумкин.
Баъзи компаниялар ўз ходимлари учун вакцинацияни мустақил равишда ташкил этишга қарор қилди. «Ситимобил» такси хизмати хабарига кўра, компания қўшимча вакцинация пунктларини ташкил қилади ва Россия фуқароларига тегишли бўлмаган, аммо таксида ишлай оладиган ҳайдовчилар учун вакциналар сотиб олади.
Yandex такси хизмати компаниялари 23 июнь куни «Яндекс Gо», «Яндекс Еда», «Яндекс маркет» «Яндекс доставка», «Яндекс лавка» сервисларида ишловчи ҳайдовчилар ва курьерлар учун эмлаш пунктларини очди. Ходимлар «Спутник V» икки компонентли вакцина билан бепул эмланади. Шунингдек, компания коронавирусга қарши эмланган ходимларни рағбатлантиришга қарор қилди. Масалан, эмланган таксичилар янги буюртмаларни бошқаларга қараганда эртароқ қабул қилиши мумкин, эмланган курьерлар ўзига қулай иш сменаси ва етказиб бериш жойларини танлаши мумкин.
Изоҳ (0)