Эронда ҳижоб тўғрисидаги қонун туфайли ҳукумат ичида зиддият юзага келди, деб ёзади Германиянинг Bild нашри.
Парламент томонидан қабул қилинган янги қонун аёллар учун ҳижобни мажбурий тақиш талабларини кучайтиради ва уни бузганлик учун қаттиқ жазолар белгилайди. Бироқ Эрон президенти Масъуд Пезешкиён ушбу қонун янги ижтимоий ғалаёнларни келтириб чиқариши мумкинлигидан хавотирланиб, унга вето қўйди.
Эроннинг Ҳамшари нашри хабар беришича, президент масалани Эрондаги асосий қарорларни қабул қилувчи Олий миллий хавфсизлик кенгашига ҳавола этган. Бу қадам қонуннинг қисман бекор қилинишига олиб келиши мумкин. Янги қонунчилик айниқса таниқли шахслар учун қаттиқ чораларни, жумладан, катта жарималар, чет элга чиқишни тақиқлаш ва мол-мулкни мусодара қилишни назарда тутади.
Яқинда эронлик мусиқачи Параста Аҳмадийнинг ҳижобсиз чиқиш қилгани ва бу видеони YouTubeда эълон қилгани жамоатчилик эътиборини тортди. У гуруҳ аъзолари билан бирга “ислом меъёрларини бузганлиги” учун ҳибсга олинган, аммо тез орада озод этилган.
Жамоатчилик босими ва ҳукуматдаги келишмовчиликлар туфайли қонуннинг қабул қилиниши вақтинча тўхтатилди. Жазо таҳдидларига қарамай, Эроннинг йирик шаҳарларида кўплаб аёллар мажбурий ҳижоб кийишга қарши очиқчасига норозилик билдирмоқдалар.
“Иффат ва ҳижоб тўғрисида”ги қонуннинг жорий этилиши
Эрон ҳукумати аввалроқ мамлакат президенти Масъуд Пезешкиённинг сайловолди ваъдаларига зид равишда “иффат ва ҳижоб тўғрисида”ги қонун лойиҳасини жорий қилаётгани ҳақида хабар берилган эди.
Iran News Update нашрининг хабар беришича, давлат эндиликда исломий кийиниш қоидаларини бузганларни янада қаттиқроқ жазолайди. Янги қоидалар нафақат сочларни кўрсатишни тақиқлайди, балки бўйин, билаклар ёки тўпиқларни беркитиш мажбуриятини ҳам юклайди.
Биринчи қоидабузарлик учун аёл 155 евро миқдорида жарима тўлайди. Агар қоидабузарлик такрорланса, жарима сезиларли даражада ошиши мумкин.
Жаримага қарши танқид ёки норозилик қўшимча жарима жазосини юклайди, унга кўра қоидабузар 155 еврогача пул тўлаши шарт. 9 ёшдан бошлаб рўмол тақиш мажбурийдир. Агар вояга етмаган қиз қонунни бузса, ота-она жавобгарликка тортилади ва қизга нисабатан “тарбиявий чоралар” кўрилади.
Такси ҳайдовчилари қоидабузарликлар ҳақида хабар бериши, турар жой мажмуалари раҳбарлари эса ҳижобсиз аёлларнинг видеоларини тегишли расмийларга узатиши шарт. Ушбу мажбуриятни бажармаганлар 339 еврогача жарима тўлайди.
Изоҳ (0)