Эрон парламенти “Ҳижоб ва иффат тўғрисида”ги қонун лойиҳасини маъқуллади. Мамлакат расмийлари исломий кийиниш қоидаларини бузганлик учун ўн йилгача қамоқ жазоси белгилади. Бу ҳақда BBC хабар берди.
Парламентнинг 152 нафар аъзоси ушбу қоидани ёқлаб, 34 нафари қарши, 7 нафари эса бетараф овоз берган. БМТ қонун аёлларга нисбатан янада кучли зўравонлик ва таъқибларга олиб келишини таъкидлади. Низом қабул қилинишидан олдин исломий кийиниш қоидаларини бузганлик учун жарима ва қамоқ жазоси қўлланилган. Эронлик аёллар полиция бўлимларида зўрлаш ҳолатлари ҳақида гапирган.
Ўтган йили 22 ёшли Маҳса Аминий ҳижобни нотўғри ўрагани учун ахлоқ полицияси томонидан ҳибсга олинганидан кейин вафот этганди. Бу Эронда норозиликларга сабаб бўлган. BBC ҳисоб-китобларига кўра, мамлакатдаги аёлларнинг 20 фоиздан ортиғи кўчага ҳижобсиз чиқишни бошлаган.
Эрон расмийларининг фикрича, қонуннинг киритилиши аёлларни исломий кийиниш қоидаларига риоя қилишга мажбур қилади. Ушбу қоида уч йил давомида амал қилади ва кейин қонунчилар уни доимий равишда ратификация қилиши мумкин.
Эронда Ислом инқилоби рўй берган 1979 йилдан бери аёллар жамоат жойларида бошларини ёпишлари шарт.
Изоҳ (0)