Эронда тўрт нафар аёл президентликка номзодини қўйди

Эрондаги президентлик сайловларида иштирок этиш учун тўрт нафар аёл ҳужжат топширди. Бу ҳақда IRNA агентлиги хабар берди.

Номзодлар қаторида Зуҳра Илоҳиён, Ҳожар Ченараний, Ҳамида Зарабадий ва Рафат Байят (коллажда кетма-кет берилган) бор. Уларнинг барчаси Эрон парламентининг собиқ депутатларидир. 

56 ёшли Илоҳиён асли шифокор ва ҳозирда Эрон Тиббиёт фанлари академиясида ишлайди. 45 ёшли Зарабадий номзодлигини рўйхатдан ўтказгандан сўнг ташқи сиёсатда “деэскалация”ни қўллаб-қувватлашини айтган ва эронликлар бир кун келиб аёл президентни сайлашига умид билдирган.

Ченараний ҳам 45 ёшда, аввалроқ парламент аъзоси бўлган, парламентнинг миллий хавфсизлик ва ташқи сиёсат бўйича комиссиясида ишлаган. Унинг отаси Эрон—Ироқ урушида қатнашган (1980–1988). У парламентдаги фаолияти давомида Эронда аёллар учун мажбурий ҳижоб бўйича қатъий қоидаларни илгари сурган.

Баят 66 ёшда, асли социолог. 2005 ва 2009 йилларда президентликка номзод сифатида рўйхатга олинган, бироқ унинг номзоди “Конституцияни қўриқлаш кенгаши” томонидан тасдиқланмаган. Шу кунгача эронлик бирорта аёл номзодларнинг якуний рўйхатига киритилмаган.

Эрон президентлигига номзодларни рўйхатга олиш 29 май куни бошланиб, 3 июнь куни якунланди. Жами 278 киши президентликка номзодини кўрсатишга уринган, бироқ атиги 80 нафари қабул қилинган. Улар ёши ва маълумоти бўйича талабларга жавоб бера олган.

Номзодлар орасида собиқ президент, 3 нафар амалдаги вазир, 13 нафар собиқ вазир, 40 дан ортиқ собиқ ва амалдаги парламент аъзолари бор. Энг ёш номзод 43 ёшда, энг кекса номзод эса 75 ёшда.

Эндиликда “Конституцияни қўриқлаш кенгаши” етти кун давомида номзодларнинг малакасини кўриб чиқади, саралашдан ўтганларнинг номлари 11 июнь куни эълон қилади. Муддатидан олдин президентлик сайловлари 28 июнга белгиланган.