Эрон парламент комиссияси ҳижоб тўғрисидаги қонунни бузганлик учун жазони кучайтиришни маъқуллади. Бу ҳақда 21 август куни DW нашри хабар берди.
Кейинги босқичда янги қонун Конституция посбонлари кенгашига — консерватив диндорлардан ташкил топган назорат органига тақдим этилади.
CNN хабарига кўра, қонун лойиҳаси 70 та моддадан иборат бўлиб, улар орасида ҳижоб ўрашдан бош тортган аёлларга нисбатан анча каттароқ жарималар ва узоқ муддатли қамоқ жазоларини, қонунни бузган машҳур шахслар ва компаниялар учун эса қаттиқроқ жазоларни назарда тутилади, шунингдек, кийиниш қоидаларини бузганларни аниқлаш учун сунъий интеллектдан фойдаланиш белгилаб қўйилади.
Ҳижобдан бош тортганлик учун жарима минг баравар ошади
Эрон қонунчилигининг амалдаги таҳририда кийиниш қоидаларини бузганлик учун 10 кундан икки ойгача қамоқ ёки 50 000 дан 500 000 Эрон риалигача (1 евродан 10 еврогача) жарима белгиланган. Янги қонунлар тўплами беш йилдан ўн йилгача қамоқ жазосини, шунингдек, 360 миллион риалгача (7 800 евро) жаримани назарда тутади.
Ҳижоб ҳақидаги қонунни кучайтириш 2022 йилги норозилик намойишларига мамлакат раҳбариятининг жавоби бўлди. Намойишларга ҳижобини “нотўғри ўрагани учун” ҳибсга олинган 22 ёшли Маҳса Аминийнинг Эрон ахлоқ полицияси бўлинмасида вафот этгани сабаб бўлди. Мамлакат ҳукумати норозилик намойишларини зўравонлик билан бостирди, жумладан, бир неча киши қатл этилди. ОАВ хабарларига кўра, норозилик намойишлари тугаганига қарамай, кўплаб аёллар ҳижоб ўраш талабига қаршилик кўрсатишда давом этмоқда. Бунга жавобан расмийлар бир неча ойдан бери чораларни кучайтириш устида ишламоқда.
Изоҳ (0)