Эронда 2022 йилнинг кузида ҳукуматга қарши бўлиб ўтган намойишларда қатнашган ўқувчи қизларнинг заҳарланиши бўйича тергов бошланди. The Guardian ўз манбаларига таяниб ёзишича, қизлар фаол сиёсий позицияси учун ўч олиш мақсадида заҳарланган.
Эронда ота-оналар қизларини мактабга юборишдан қўрқиб, онлайн таълимга ўтишга чақирмоқда
“Қум шаҳрида бир неча талаба қиз заҳарланганидан кейин маълум бўлдики, айрим кишилар барча мактаблар, айниқса, қизлар мактабларининг ёпилишини хоҳламоқда”, — дея нашр Эрон таълим вазири ўринбосари Юнес Панаҳийнинг сўзларидан иқтибос келтирган.
Унинг қўшимча қилишича, “ўқувчи қизларни заҳарлашда қўлланилган кимёвий моддалар ҳарбий кимёвий моддалар бўлмаган”.
Парламентнинг соғлиқни сақлаш комиссияси аъзоси доктор Ҳомаюн Самияҳ Нажафободий “Қум ва Боружерд каби шаҳарларда ўқувчи қизларнинг заҳарланиши атайлаб қилинган”ини тасдиқлади.
Заҳарланиш ҳолатларини даволашга ихтисослашган шифокор The Guardian нашрига исмини ошкор қилмаслик шарти билан айтишича, мавжуд далилларни ҳисобга олган ҳолда, “бу заҳарланишнинг энг кўп эҳтимолий сабаби кучсиз фосфорорганик модда бўлиши мумкин”.
Шифокорнинг сўзларига кўра, заҳарланиш сабаби “мамлакат ичидаги ва ташқарисидаги экстремистик гуруҳлар ёрдамида намойишчиларни қўрқитиш” истаги бўлган.
“Улар яқинда бўлиб ўтган норозилик намойишларида фаол иштирок этган ўқувчи қизлардан ўч олмоқчи”, — дея тушунтирди шифокор.
Нашрнинг ёзишича, заҳарланиш ҳолатлари кўплаб қизларнинг мактабга бормай қўйишига олиб келган. Қумлик ўқитувчининг айтишича, ҳозирда 250 нафар ўқувчидан атиги 50 нафари дарсга қатнашмоқда. Ўтган ҳафта заҳарланган қизларнинг ота-оналари шаҳар ҳокимлиги олдида норозилик намойиши ўтказган, бир қанча мактаблар ёпилган.
Эронда оммавий норозилик намойишлари ўтган йил сентябрь ойи ўрталарида бошланди ва деярли уч ой давом этди. Якунда аёллар эндиликда, де-факто, йирик шаҳарларда ҳижоб кийишнинг қаттиқ мажбуриятига риоя қилмаслиги мумкин бўлди. Хавфсизлик кучлари томонидан намойишларнинг шафқатсиз бостирилиши оқибатида бир неча юз киши ҳалок бўлди, қатл қилинди, 10 мингдан ортиқ киши ҳибсга олинди. Ҳозирда ҳибсга олинганларнинг аксарияти озод қилинган.
Изоҳ (0)