Вашингтон ва Абу-Даби Сурия президенти Башар Асад Эрондан узоқлашиб, Ливаннинг “Ҳизбуллоҳ” гуруҳига қурол етказиб беришни тўхтатса, унга нисбатан санкцияларни бекор қилиш имкониятини муҳокама қилмоқда. Бу ҳақда музокаралардан хабардор бешта манбага таяниб Reuters хабар берди.
Қайд этилишича, Американинг Сурияга қарши санкциялари 20 декабрда тугаши муносабати билан АҚШ ва БАА сўнгги ойларда муҳокамаларга киришган. Музокаралар исёнчи кучлар Ҳалаб шаҳрига юришидан олдин бошланган.
“Ҳукуматга қарши қўшинларнинг янги ҳужуми БАА ва Қўшма Штатлар фойдаланмоқчи бўлган Асаднинг Эрон билан иттифоқининг заифлигини кўрсатади. Аммо, агар Асад қарши ҳужум учун Эрондан ёрдам сўрашга қарор қилса, бу уларни ажратиш ҳаракатларини мураккаблаштириши мумкин”, дейди нашр манбалари.
Манбаларнинг таъкидлашича, Асад исённи бостириш учун шиа Эронидан ёрдам сўрагач, унга қарши чиққан сунний араб давлатлари назарида Абу Даби Асаднинг тикланишида муҳим рол ўйнамоқда.
“БАА узоқ вақтдан бери Асадни Эрондан узоқлаштиришга ва Сурия билан бизнес алоқаларини ўрнатишга интилган, аммо АҚШ санкциялари бу ҳаракатларга тўсқинлик қилмоқда”, дея қўшимча қилди манбалар.
Бир кун аввал Эрон томонидан қўллаб-қувватланаётган Ироқ қўшинлари Сурия ҳукумати қўшинларига Ҳалабни эгаллаган исёнчиларга қарши курашишда ёрдам бериш мақсадида Сурия чегарасини кесиб ўтгани ҳақида хабар берилган эди.
Изоҳ (0)