Афғонистондаги ўзбеклар етакчиси, нуфузли ҳарбий ва сиёсий арбоб Абдурашид Дўстум куни кеча Афғонистон—Ўзбекистон чегарасини кесиб ўтган ва ҳозирда Ўзбекистон ҳудудида бўлиб турибди. Бу ҳақда вазиятдан бохабар манбага таяниб, Россиянинг «РИА Новости» агентлиги хабар бермоқда. Reuters агентлиги ўз манбаларига асосланиб ёзишича, Мозори-Шариф қўлдан кетгач, Дўстум хавфсиз Ўзбекистон томон чекинган.
Россиянинг «ТАСС» агентлиги афғонистонлик Ҳамид исмли журналистга таяниб хабар беришича, маршал Дўстум толиблардан қочиб, ўз яқинлари билан бирга ўзбек—афғон чегарасидаги ягона назорат-ўтказиш пункти орқали Ўзбекистонга ўтган. Аввалроқ Ўзбекистон Ташқи ишлар вазирлиги 15 август куни 84 нафар афғонистонлик чегарадан ўтгани ва улар ДХХ Чегара қўшинлари томонидан қўлга олинганини маълум қилган эди.
Ўзбекистон расмийлари Абдурашид Дўстумнинг ҳозирги вақтда мамлакат ҳудудида эканини ҳозирча на тасдиқлади ва на рад этди. «Дарё» ҳозирча ушбу масала юзасидан Ўзбекистоннинг ваколатли органларидан маълумот ололганича йўқ.
Эслатиб ўтамиз, 14 август куни Афғонистон ҳукуматининг мамлакат шимолидаги сўнгги таянчи ҳисобланган Мозори-Шариф шаҳри «Толибон» назорати остига ўтди. Шаҳарни ташлаб қочган Афғонистон мудофаа ва хавфсизлик кучлари, жумладан, Термиз—Ҳайратон кўпригига йиғилган ва чегаранинг Ўзбекистон томондан очилишини кутган.
Маълумотларга кўра, улар орасида Афғонистон ўзбеклари етакчиси Дўстум ва тожиклар етакчиси Ато Муҳаммад Нур ҳам бўлган. Бироқ уларнинг айни вақтда қаерда экани расман номаълум. Ато Муҳаммад Нур 15 августга ўтар кечаси Twitter’даги саҳифасида хабар қолдириб, ўзи ва маршал Дўстум «хавфсиз жойда» эканини маълум қилган эди.
«ТАСС»нинг қайд этишича, толиблар Мозори-Шарифни иккинчи марта ортиқча қийинчиликсиз қўлга киритди. «Толибон» бу шаҳарни биринчи марта 1998 йили босиб олган ва уни 2001 йилга қадар ўз назорати остида ушлаб турган. Худди бу йилгидек, 1998 йили ҳам шаҳар мудофаасига Абдурашид Дўстум раҳбарлик қилган.
«Дўстум 1998 йили пойтахтида кўпдан бери унинг оиласи ва яқин қариндошлари истиқомат қиладиган Ўзбекистон томон қочишга уринган. Бироқ уни республиканинг Биринчи Президенти Ислом Каримов кўрсатмасига мувофиқ Ўзбекистонга киритишмаган, оқибатда у Туркияга қочишга мажбур бўлган эди», — деб ёзади «ТАСС» агентлиги.
Изоҳ (0)