Афғонистонда бошланган президентлик сайловларида учта асосий сиёсий гуруҳ кураш олиб бормоқда

Экспертларга кўра, Афғонистонда бошланган президентлик сайловларида учта асосий сиёсий гуруҳ шаклланганини кўриш мумкин. Бу ҳақда Afghanistan.ru хабар бермоқда.

Амалдаги президент гуруҳи

Ашраф Ғани шахсий омиллари ва сиёсий иттифоқдошларига нисбатан иккиланишлар туфайли сиёсий изоляцияда қолди. Бироқ бу инқирозни енгиб ўтиш учун у анчайин тавакккал ишга қўл урди ва деярли амалга оширишга улгурди — ўз атрофида асосан ёшлар ҳисобига янги сиёсий доирани шакллантирди. Этник жиҳатдан эса Ғани пуштунларнинг овозига умид қилмоқда.

Амалдаги бош вазир гуруҳи

Абдулла Абдулла пуштун бўлмаган миллатларнинг асосий етакчилари кирган, этник жиҳатдан кенг сайловолди жамоасини шакллантиришга муваффақ бўлди. Асосий етакчилари Абдуллани қўллаб-қувватлайдиган афғонистонлик хазорийлар ва ўзбеклар энг интизомли сайловчилар ҳисобланади. Шунингдек, Абдулланинг номзодини мужоҳидлар ҳам маъқуллайди.

Ўтиш даври ҳукумати тарафдорлари гуруҳи

Ҳозирда унинг етакчиси сифатида Афғонистон собиқ президенти Ҳамид Карзайни айтиш мумкин. Унинг ташаббуси билан мазкур гуруҳнинг иккита йиғилиши ўтказилди. Йиғилиш қатнашчилари сайловларни бошқа вақтга қолдириш ҳақидаги фикрни илгари сурган. Афғонистон президентининг миллий хавфсизлик масалалари бўйича собиқ маслаҳатчиси Муҳаммад Ханиф Атмар гуруҳи аъзолари ва бошқа икки блокда қўним топмаган сиёсатчилар ушбу фракция ўзаги ҳисобланади. Сайловларга қарши чиққан «Толибон» жангариларини ҳам тактик жиҳатдан уларнинг иттифоқдоши санаш мумкин.

Охирги тадқиқотлар натижасига кўра, сайловлар тарафдори бўлган номзодларнинг (Ашраф Ғани ва Абдулла Абдулла) ғолиблик имкониятлари деярли тенг: тегишли равишда 18,65 ва 19,41 фоиз.