Қирғизистон ва Тожикистон чегарачилари ўртасида яна отишма содир бўлди, ҳодиса оқибатида бир нафар қирғиз ҳарбийси яраланган. Бу ҳақда Қирғизистон Миллий хавфсизлик давлат қўмитасининг чегара хизмати маълумотига таяниб, «РБК» хабар берди.
«2022 йил 12 апрель куни қирғиз-тожик давлат чегарасида қуролли низо содир бўлди. Қирғизистон чегарачилар наряди Боткен вилоятининг Селкан Лейлек тумани ҳудудида хизматни ўтаётган вақтда ушбу ерга яқин жойда тожик чегарачилари пайдо бўлган, улар ҳамкасбларини кўрган бўлишига қарамай давлат чегарасининг шартли чизиғи томон ҳаракатни давом эттирган. Тожикистон аскарлари Қирғизистон чегарачиларининг тўхташ ва чегара чизиғидан узоқлашиш бўйича талабини писанд қилмаган, чегарани бузиб, Қирғизистон ҳудудида 20 метр масофа ичкарига кирган», — дейилади Қирғизистон Миллий хавфсизлик давлат қўмитаси чегара хизматининг хабарида.
Қирғизистон томони тожик чегарачиларининг мамлакат ичкарисига янада ичкарироқ киришини олдини олиш мақсадида уларга қарата огоҳлантириш тарзида ўт очган. Тожикистон чегарачилари бунга жавобан қирғиз аскарларига ўқ узган. Чегара хизмати маълумотига кўра, ҳодиса оқибатида тожикистонлик ҳарбий яраланган.
Кейинчалик Қирғизистон чегара хизмати «24.kg» нашрига яна такрорий отишма юз бергани ва у 30 дақиқа давом этганини маълум қилган. Тожик томони Қирғизистоннинг Достук қишлоғини миномётлардан ўққа тутган.
Тожикистон ҳукумати ҳодиса юзасидан расмий изоҳ бермаган.
Қирғиз-тожик чегарасидаги тўқнашувлар 2022 йил январь охиридан буён давом этмоқда: йил бошида икки давлат чегарасида юз берган отишма оқибатида икки нафар чегарачи ҳалок бўлган, олти нафар тожикистонлик ҳарбий яраланган, Қирғизистон томонидан эса саккиз нафар ҳарбий жароҳатланганди.
Ушбу воқеадан кейин Тожикистон ҳамда Қирғизистон делегациялари чегарада ўт очишни тўхтатиш, низо содир бўлганидан кейин олиб келинган қўшимча куч ва воситаларни у ердан узоқлаштиришни келишиб олганди. Шунга қарамай чегарада бу каби низо ҳамда тўқнашувлар тез-тез содир бўлиб турибди.
Қирғизистон ва Тожикистон чегарасининг узунлиги 970 километрни ташкил қилади. Шундан 460 километр масофа юзасидан икки давлат ўртасида келишув мавжуд эмас, бунинг оқибатида чегарада турли низолар содир бўлади, икки мамлакат вакиллари ҳам чегарадаги бир қатор ҳудудлар ўзларига тегишли эканини даъво қилиши оқибатида аҳоли ёки чегарачилар ўртасида келишмовчиликлар юзага келади.
Тожик-қирғиз чегарасида қуролли тўқнашувлар охирги йилларда кўп кузатилмоқда. Сўнгги марта энг катта отишмалардан бири ўтган йили апрель ойида юзага келган. Низога икки давлат учун баҳсли ҳудуд ҳисобланган «Головной» сув тақсимлаш иншооти яқинига камералар ўрнатилиши сабаб бўлган. Аҳоли ўртасидаги келишмовчиликка кейинчалик икки мамлакат ҳарбийлари ҳам аралашган.
Тўқнашув оқибатида Қирғизистоннинг 180 нафар фуқаросига талафот етган, 34 киши ҳалок бўлган. Тожикистон эса низо оқибатида жароҳатланганлар ва ҳалок бўлганлар ҳақида расмий ахборот бермаган.
Изоҳ (0)