Қирғизистон ва Тожикистон ҳукумат делегациялари раҳбарлари давлат чегараси бўйича тўлиқ келишувга эришди. Бу ҳақда Қирғизистон Вазирлар Маҳкамаси матбуот хизмати маълум қилди.
Боткен шаҳрида 4 декабрь куни давлат чегарасини делимитация ва демаркация қилиш бўйича Қирғизистон ва Тожикистон ҳукумат делегациялари ҳамраислари Қамшибек Ташиев ва Саймўмин Ятимов учрашди.
Учрашув давомида томонлар келишувга эришиб, Қирғизистон-Тожикистон давлат чегарасининг қолган қисмларини белгилашни тўлиқ якунлади. Ҳукумат делегацияларининг ишчи гуруҳларига давлат чегарасини делимитация қилиш бўйича якуний ҳужжатларни тайёрлаш топширилди.
Делимитация (давлат чегарасини белгилаш, унинг ўтишини тавсифлаш ва харитага тушириш) бўйича музокаралар 2002 йил декабридан буён давом этмоқда. Бу масаланинг ҳал этилмагани икки республика маҳаллий аҳолиси ва ҳарбий хизматчилари ўртасида бир неча бор можароларга сабаб бўлган, жумладан ўқотар қуроллар ҳам ишлатилган. Бундай можароларнинг охиргиси 2022 йил куз бошида содир бўлди. Ўшанда Қирғизистон томонидан тўқнашувлар пайтида 60 дан ортиқ киши ҳалок бўлганди.
Изоҳ (0)