Қозоғистон Марказий Осиё давлатларидан Сирдарё бўйлаб 11 миллиард куб метр сув олиши мумкин.
Мазкур режа 2025 йилнинг апрелига қадар Марказий Осиё давлатлари билан келишувлар асосида амалга оширилиши режалаштирилган. Бу ҳақда Ашхободда бўлиб ўтган Давлатлараро мувофиқлаштирувчи сув комиссияси (ДМСК) йиғилиши якунлари бўйича Қозоғистон Сув хўжалиги ва ирригация вазирлиги матбуот хизмати хабар берди.
Йиғилишда Тожикистон, Туркманистон ва Ўзбекистон сув хўжалиги идоралари раҳбарлари иштирок этди. Қирғизистон томони кузатувчи сифатида қатнашган.
Умумий ҳисобда, Марказий Осиё давлатларидан Қозоғистонга 2025 йил апрелига қадар қишлоқ хўжалиги экинларини суғориш учун 11 миллиард куб метр сув етказиб бериш кутилмоқда.
Бундан ташқари, йиғилиш иштирокчилари Сирдарё ва Амударё ҳавзаларидаги сув омборлари иш режимларининг прогноз жадвалларини, шунингдек, Марказий Осиё мамлакатлари учун 2024—2025 йиллар куз-қиш мавсуми учун сув таъминоти лимитларини тасдиқлаган.
Қозоғистон сув хўжалиги ва ирригация вазири Нуржан Нуржигитов музокаралар ва биргаликдаги ҳаракатлар туфайли Сирдарё ҳавзасида сувнинг самарали тақсимланиши таъминланганини қайд этган.
Шунингдек, учрашув якунлари бўйича вазирлик маълумотларига кўра, Қирғизистон билан сув-энергетика соҳасида ҳамкорлик бўйича келишувлар амалга оширилиб, жорий йилнинг суғориш даврида “Баҳри—Тожик” сув омборидан фойдаланишни мувофиқлаштириш чоралари кўрилган.
Қозоғистон сув тақчил давлат ҳисобланиб, мамлакат ҳудудининг 2,8 фоизи сув билан қопланган, учдан икки қисми қурғоқчил зоналардан иборат. Сув ресурсларининг салмоқли қисми қўшни давлатлардан келади.
2023 йил якунига кўра, аҳолини сув билан таъминлаш шаҳарларда 98,9 фоизни, қишлоқларда эса 96,6 фоизни ташкил этган. Мамлакатнинг фақат тўққизта вилояти 100 фоиз сув билан таъминланган.
Ўрта Осиёдаги энг йирик дарё ҳисобланган Сирдарё тўрт давлат: Қирғизистон, Тожикистон, Ўзбекистон ва Қозоғистон ҳудудидан ўтиб, Орол денгизига қуйилади.
Изоҳ (0)