Россия ташқи савдо банки раҳбари Андрей Костин Россияда ишчи кучининг ҳалокатли етишмовчилиги мавжудлигини ва шу сабабли мамлакатнинг мигрантларга муҳтожлигини таъкидлади. У бу ҳақда Россия Федерал молия университетининг “Янги иқтисодий сиёсат 2.0: мослашувдан ютуққача” IX халқаро форумининг ялпи мажлисида маълум қилган.
Костиннинг фикрича, ишчи кучи танқислиги иқтисодиёт ривожланишини чеклайди. У кадрлар етишмаслигини “ҳалокатли” деб баҳолади.
“Айтганча, бизда мигрантларга нисбатан муносабат кескин ёмонлашди. Лекин, дўстлар, бугунги кунда иқтисодиётимиз мигрантларсиз нафас ололмайди, биз барибир бу масалани ҳал қилишимиз керак. Албатта, уларни ҳайдаб чиқариш осон, аммо кимдир ишлаши керак-ку”, дея афсус билан таъкидлаган банкир.
Костиннинг маълум қилишича, ЦБ бошқарувига ўтказилган Бирлашган кемасозлик корпорациясида турли касблар бўйича ишчи кучи танқислиги 10 фоиздан 20 фоизгача етади.
Яқинда ФинЭкспертиза аудиторлик-консалтинг тармоғи Россияда кадрлар танқислиги рекорд даражага етганини маълум қилган эди. Сентябрь ойи охирига келиб, иш билан таъминланмаган россияликлар сонига нисбатан ходимларни қидириш бўйича эълонлар сони 5 га 1 нисбатни ташкил этди.
Энг катта кадрлар тақчиллиги Амур вилоятида кузатилмоқда. У ерда ҳар бир ишсизга 29 та бўш иш ўрни тўғри келади. Ленинград вилоятида бир нафар ишсизга 25 та, Нижний Новгород вилоятида 22 та, Тула вилоятида 20 та ва Орёл вилоятида бир нафар ишсизга 13 та очиқ вакансия тўғри келади.
Краснодар ўлкасида иш қидираётганларга қараганда 80,7 минг кишига, Москвада эса 79,7 минг кишига кўпроқ ишчига талаб мавжуд. Шу билан бирга, Ингушетияда бир иш қидирувчига атиги 0,01 та, Чеченистонда ишсизга 0,1 та, Тува ва Доғистонда эса 0,5 тадан бўш иш ўрни тўғри келади.
Сентябрь ойи охирида россиялик иш берувчиларга 2 миллион ишчи етишмаяпти. Бандлик хизмати органларига 392 минг киши мурожаат қилган. Яъни иш изловчилар тақчилликнинг фақат бешдан бир қисмини қоплаши мумкин. Бу 2005 йилдан буён кузатилган барча даврдаги энг паст кўрсаткич ҳисобланади.
Энг кучли кадрлар тақчиллиги савдода, айниқса чакана савдода кузатилган. Шунингдек, қўриқлаш ва тозалов компанияларида ҳамда маъмурий фаолият соҳасида ҳам ходимлар танқислиги мавжуд.
Москва бўйича Федерал суд ижрочилар хизмати (ФССП) Бош бошқармаси матбуот хизматининг маълум қилишича, жорий йилда Москвадан чет элга мажбурий тарзда чиқариб юборилган чет эл фуқаролари сони 37 фоизга ошган.
Чиқариб юборилганларнинг аксарияти МДҲ давлатларидан бўлиб, улар орасида энг кўп Ўзбекистон, Тожикистон ва Қирғизистон фуқаролари бўлган.
Аввалроқ Россиянинг Липецк вилояти губернатори Игор Артамонов меҳнат муҳожирлари қонуний ва ноқонуний бўлиши, аммо иккаласини ҳам хуш кўрмасликларини маълум қилганди.
Изоҳ (0)