Тожикистоннинг 1 октябрь ҳолатига кўра ташқи қарзи 3,25 миллиард долларни ташкил этиб, йил бошига нисбатан 0,2 фоизга ёки 7,1 миллион долларга ошди. Бу ҳақда Молия вазирлигига таяниб, AsiaPlus хабар берди.
Тожикистоннинг асосий кредитори Хитой (1 миллиард доллар) ҳисобаланади. Қарздорликнинг катта қисми Жаҳон банки (370 млн доллар), Осиё тараққиёт банки (260 млн доллар), Ислом тараққиёт банки (212 млн доллар) ҳамда Европа тикланиш ва тараққиёт банки (167 млн доллар) ҳиссасига тўғри келади.
Бундан ташқари, 2017 йилда Роғун ГЭС қурилиши учун жалб қилинган 500 миллион долларлик еврооблигациялар бўйича қарздорлик тўланмай қолган. Ҳозирги вақтда ҳукумат ушбу облигациялар бўйича фоизлар тўлайди.
Келгуси йилда Роғун ГЭС қурилишини якунлаш учун халқаро ҳамкорлардан янги кредитлар жалб қилиниши кутилмоқда, бу эса мамлакат ташқи қарзининг сезиларли даражада ошишига олиб келиши мумкин.
Изоҳ (0)