Аввалроқ маҳаллий аҳоли томонидан ёпиб қўйилган Қирғизистон ва Тожикистон чегарасидаги зиддиятли ҳудуддаги автомобиль йўллари яна очилди. «ТАСС»нинг хабар беришича, бу ҳақда Қирғизистон Давлат чегара хизмати маълум қилган.
«2019 йилнинг 25 июлидан бошлаб Боткен-Исфаҳон (Қирғизистон) ва Исфара-Ворух (Тожикистон) автотрассаси ҳаракатланиш учун очилди», — дейилган хабарда. Шунга қарамай, ДЧХ маълумотига кўра, у ерда жойлашган икки мамлакатнинг чегара бўлинмалари кучайтирилган тартибда ишлашда давом этмоқда.
Қирғизистоннинг Оқсой қишлоғи ва Тожикистоннинг Ворух анклави ҳудудида Қирғизистон ва Тожикистон аҳолиси ўртасида 22 июль кечаси тўқнашув содир бўлган ва қарийб бир сутка давом этган. Бунга томонлардан бири баҳсли ҳудудда флагшток ўрнатгани сабаб бўлган. Тўқнашув вақтида иштирокчилар ов қуроллари, тош ва таёқлардан фойдаланган.
Можаролар оқибатида умумий ҳисобда бир киши ўлдирилган. 30 дан ортиқ одам, шу жумладан чегарачилар ва милиция ходимлари ҳам яраланиш ва жароҳатлар олган. Қирғизистон хавфсизлик мақсадида Оқсойдан вилоят маркази Боткенга 600 нафардан ортиқ одамларни, асосан, аёллар, болалар ва кексаларни олиб кетишга мажбур бўлган.
Қайд этилишича, яқин кунларда бу икки давлат раҳбарлари учрашади ва баҳсли ҳудуд муаммосини муҳокама қилади.
Изоҳ (0)