Қирғизистон ва Тожикистон ўз қўшинларини чегарадан олиб кетишни бошлади

Қирғизистон ва Тожикистон ўз қўшинларини давлат чегарасидан олиб чиқиб кетмоқда. Бу ҳақда Қирғизистон Миллий хавфсизлик давлат қўмитаси чегара хизматига таяниб, «Коммерсантъ» хабар бермоқда. Муассаса сўнгги бир кечада отишмалар ва бошқа ҳодисаларни қайд этмади.

«Томонлар қўшимча куч ва воситаларни давлат чегараси чизиғидан доимий жойлашув нуқталарига олиб кетишни бошлади», — дейилади чегара хизмати хабарида. Таъкидланишича, чегара бўлинмалари «кучайтирилган режимда хизмат олиб бормоқда».

Аввалроқ Қирғизистонда Тожикистон билан чегарада содир бўлган можарода ҳалок бўлганлар хотирасига 1–2 май кунлари мотам эълон қилинган эди.

Қирғизистон ва Тожикистон чегарасидаги низо 28 апрель куни маҳаллий аҳоли ўртасидаги жанжал билан бошланган эди. У эса тожикистонлик ҳарбийлар баҳсли ҳудудда жойлашган «Головной» сув тақсимлаш пункти яқинидаги электр устунига видеокузатув камераларини ўрнатганидан кейин келиб чиққан. Қирғизистон чегара хизматининг ахбороти бўйича 29 апрелда икки давлат ҳарбийлари ўртасида отишма содир бўлган. Идора тожик томонининг миномёт ҳисоб-китоб позицияларини эгаллашни ташкиллаштираётганини қайд этган.

Қирғизистон Соғлиқни сақлаш вазирлигининг маълумотларига кўра, 30 апрель куни эрталаб соат 07:50 ҳолатига кўра, тўқнашув пайтида 134 нафар қирғизистонлик турли даражада жароҳат олди, 13 киши ҳалок бўлди. Қирғизистон ҳукумати Тожикистон билан чегарадаги можаро зонасидан 2726 фуқарони хавфсиз жойларга эвакуация қилган.

Тожикистон ҳукумати чегарадаги қуролли тўқнашув пайтида ҳалок бўлганлар ва жароҳат олганлар тўғрисида ҳали расмий маълумот бермаган.

Asia Plus манбаларига таяниб, хабар беришича, Сўғднинг Исфара шаҳри ва Бобожон Ғофуров туманида 30 апрель куни эрталаб тўқнашувлар пайтида 90 дан ортиқ Тожикистон фуқаролари жароҳат олган, 10 га яқини ўлдирилган.

30 апрель куни эрталаб Қирғизистон президенти Тожикистон билан чегарадаги вазият барқарорлашганини маълум қилди. Шундан сўнг ҳам Қирғизистон Тожикистон билан чегарада яна отишмалар юз бергани ва ҳарбий техника тўплангани ҳақида хабар берди. Қирғизистон Тожикистонни провокацияларда айбламоқда. Шу куни Қирғизистон ва Тожикистон президентлари музокаралар ўтказди.

Тожикистон ва Қирғизистон ўртасидаги чегара можаросининг тарихи

Собиқ иттифоқ парчаланганидан кейин тожик-қирғиз чегарасидаги 70 га яқин ҳудуд баҳсли бўлиб қолди, шу сабабли маҳаллий аҳоли ва икки мамлакат чегарачилари ўртасида мунтазам равишда низолар юзага келади, баъзан эса бу одамлар ҳалок бўлишига ҳам олиб келади. Икки мамлакат ўртасидаги чегаранинг жами узунлиги — 970,8 км. Участкаларни делимитация ва демаркация қилиш жараёни 2002 йилда бошланган, ўшанда тегишли давлатлараро комиссия тузилган эди. 2000 йиллар охирида чегараларни белгилаш учун қонуний асосни аниқлашда қийинчиликлар юзага келиши туфайли бу иш тўхтатиб қўйилди. Ҳозирги вақтда, ҳукуматлар маълум қилишича, чегаранинг 519 км қисми аниқлаштирилган ва таснифланган, қолган участкалар эса баҳсли бўлиб қолмоқда.