Жорий йилнинг 11 декабрь куни бўлиб ўтган Олий Мажлис Қонунчилик палатаси мажлисида Маъмурий жавобгарлик тўғрисидаги кодексга жамоат транспортидан фойдаланиш самарадорлигини оширишга қаратилган ўзгартириш ва қўшимчалар киритишни назарда тутувчи қонун лойиҳаси биринчи ўқишда кўриб чиқилди. Қонун лойиҳаси муҳокамаси қизғин баҳсларга бой бўлди.
Қонун лойиҳаси ташаббускори Ички ишлар вазирлиги бўлиб, ҳужжатни биринчи ўқишга Коррупцияга қарши курашиш ва суд масалалари қўмитаси киритган.
Спикернинг ўринли саволи
Муҳокамалар давомида спикер Нуриддин Исмоилов қонун лойиҳаси жамоатчилик муҳокамасига қўйилган ёки қўйилмагани, улардан қандай фикрлар олингани билан қизиқди.
Саволга жавоб берган ИИВ жамоат хавфсизлиги департаменти ЙҲХХ бошлиғи ўринбосари Эрали Бозоров жамоатчилик муҳокамасига қўйилгани ва фикрлар олинганини билдирди.
Шундан сўнг Нуриддин Исмоилов ҳамма қўллаб-қувватлаганми деган саволни ўртага ташлади.
Эрали Бозоров эса вазирлик ва идоралардан асосий қисми бўйича ижобий хулоса олинганини айтди.
Қонун лойиҳасини regulation.gov.uz порталининг эски ва янги талқинидан топишнинг иложи бўлмади. Шунингдек, йўл ҳаракати хавфсизлиги хизмати ахборот хизмати раҳбари Зойир Йўлдошевга мурожаат қилганимизда унинг ўзи ҳам порталдан қонун лойиҳасини тополмаганлигини билдириб, мутахассислардан яна сўраб кўришини билдирди.
Жамоатчилик муҳокамасига қўйилиши шартмиди?
“Норматив-ҳуқуқий ҳужжатлар тўғрисида”ги Қонуннинг 23-моддасига мувофиқ ишлаб чиқувчи лойиҳаларни жамоатчилик ёки мутахассислар муҳокамасига олиб чиқиши лозим. Шунингдек, мазкур ҳужжатнинг 24-моддасига мувофиқ ишлаб чиқувчи томонидан ҳужжат матни НҲҲ лойиҳалари муҳокамаси порталида жамоатчилик муҳокамасини ўтказиш учун қонунчиликда белгиланган тартибда жойлаштирилиши, муҳокама муддатини тартибга солинадиган ижтимоий муносабатларнинг ўзига хос хусусиятларидан келиб чиққан ҳолда белгилаши, бунда муддат ўн беш кундан кам бўлмаслиги керак.
Бундан ташқари Президентнинг 2024 йил 20 февралдаги “Қонунларнинг ижтимоий муносабатларни тартибга солишдаги ролини ҳамда норма ижодкорлиги жараёни сифатини янада ошириш бўйича қўшимча чора-тадбирлар тўғрисида”ги ПҚ-75-сон қарорига асосан 1 мартдан бошлаб энг муҳим иқтисодий ва ижтимоий-сиёсий аҳамиятга эга норматив-ҳуқуқий ҳужжатлар лойиҳаларини ишлаб чиқишдан олдин уларнинг тайёрланиши ҳақидаги ахборот НҲҲ лойиҳалари муҳокамаси порталига жойлаштирилиши лозимлиги ҳам белгилаб қўйилган.
Норматив-ҳуқуқий ҳужжатлар лойиҳалари ва қабул қилинган норматив-ҳуқуқий ҳужжатларнинг тартибга солиш таъсирини баҳолаш услубиёти 30-бандига мувофиқ лойиҳа ва тартибга солиш таъсирини баҳолаш бўйича ҳисобот ишлаб чиқувчи томонидан Норматив-ҳуқуқий ҳужжатлар лойиҳалари муҳокамаси порталига (regulation.gov.uz)га жойлаштириш орқали мажбурий тартибда жамоатчилик муҳокамасидан ўтказилади.
Вазирлик қонун лойиҳаларини доимий муҳокамадан ўтказган, бироқ
Изланишлар давомида Ички ишлар вазирлиги томонидан 2018 йилнинг август ойидан жорий йилнинг октябрь ойига қадар 87 қонун лойиҳаси regulation.gov.uz га жойлаштирилиб, жамоатчилик муҳокамасидан ўтказилганлиги аниқланди.
Аммо куни кеча парламентда кўриб чиқиш учун киритилган қонун лойиҳалари жойлаштирилмаганлиги ажабланарли?
Ички ишлар вазирлиги нима учун қонун лойиҳаларини жамоатчилик муҳокамасидан ўтказмасдан парламентга кўриб чиқиш учун киритди?
Қонун лойиҳаларини ишлаб чиқишда қайси вазирлик ва идораларнинг хулосалари олинди?
Қайси хорижий мамлакатларнинг тажрибалари ўрганилди?
"Дарё" қонун лойиҳасини ишлаб чиқувчилардан саволларга жавоб кутиб қолади.
Изоҳ (0)