Олий Мажлис Қонунчилик палатаси мажлисида “Ўзбекистон Республикасининг айрим қонун ҳужжатларига жиноятчиликка қарши курашиш бўйича фаолиятнинг ҳуқуқий асосларини такомиллаштиришга қаратилган қўшимча ва ўзгартиришлар киритиш тўғрисида”ги қонун лойиҳаси иккинчи ўқишда кўриб чиқилди.
Таклиф этилаётган қонун лойиҳаси билан “Тезкор-қидирув фаолияти тўғрисида”ги қонунига маълумотларни тўплаш, тезкор киритиш, ниқобланган операция каби тезкор-қидирув тадбирларини амалга ошириш тартибини аниқлаштиришни, шунингдек, ахборот технологиялари соҳасидаги жиноятчиликка қарши курашишнинг ҳуқуқий асосларини мустаҳкамлашни, тезкор-қидирув тадбирлари ахборот-коммуникация технологияларини қўллаган ҳолда, шу жумладан, кибермаконда ва (ёки) унинг имкониятларидан фойдаланган ҳолда ўтказилиши мумкин эканини белгилашни назарда тутувчи қўшимча ва ўзгартиришлар киритилмоқда.
Депутатларнинг айтишича, ушбу қонун лойиҳасининг қабул қилиниши жамоат тартибини сақлашни ва фуқаролар хавфсизлигини янада ишончли таъминлашга, шунингдек, ҳуқуқбузарликлар профилактикаси ва жиноятчиликка қарши курашиш бўйича тадбирлар самарадорлигини оширишга кўмаклашади.
“Қизғин баҳс-мунозаралар, савол-жавоблар ва узоқ тортишувлардан сўнг, қонун лойиҳаси депутатлар томонидан қабул қилинди”, — дейилади хабарда.
Эслатиб ўтамиз, 2019 йилда президент томонидан имзолаган қонун билан “Тезкор-қидирув фаолияти тўғрисида”ги қонун тўлдирилган эди. Ўзгартириш билан Мудофаа вазирлиги ҳарбий разведкасига Ўзбекистон ҳудудида тезкор-қидирув фаолиятини амалга ошириш ҳуқуқи берилганди. Бошқа давлат органлари, шунингдек, юридик ва жисмоний шахслар томонидан тезкор-қидирув фаолиятини амалга ошириш тақиқланади.
Изоҳ (0)