Черногорияда президент Мило Жукановичнинг тарафдорлари томонидан 12 декабрь куни парламент биноси олдида ўтказилган митинг полиция билан тўқнашувларга айланиб кетди.
Намойишга парламент мажлиси сабаб бўлган. Унда мамлакат раҳбари ваколатларини чекловчи янги қонун лойиҳаси маъқулланган.
Подгорицадаги намойишчилар парламент биносига тош ва шишалар отган, шунингдек, ҳимоя панжарасинини бузишга ҳаракат қилган. Полиция тартибсизликларни бостириш учун кўзни ёшлатувчи газ ишлатган.
«Митинг иштирокчилардан баъзилари Черногория парламенти биноси олдида жойлашган ҳимоя панжараси олдига йиғилиб, унинг бир қисмини бузиб ташлади. Сўнг кордондаги полициячиларга тош, шишалар, пиротехника ва бошқа жароҳат етказувчи воситалар ота бошлади, шунингдек, зобитлар ва парламент томонга кўздан ёшлатувчи газ пуркашди», — дейилади полиция бошқармаси хабарида.
«Бу жараёнда бир неча полиция ходимлари ва парламент биносига зарба берилди. Буни содир этганлар ўзларининг шахсини яшириш учун юзларига ниқоб ва бошларига капюшон кийиб олганди. Полиция раҳбарияти уларга зобитларга қарши ҳужумни тўхтатишни буюрганига қарамай, улар буни эътиборга олмади. Ҳужумни қайтариш учун энг юмшоқ восита – қичитадиган қўл пуркагичидан фойдаланиш буюрилди», — дея қўшимча қилинган хабарда.
12 декабрь куни Черногория парламенти депутатлари узоқ давом этган баҳс-мунозаралардан сўнг мамлакат президенти тўғрисидаги қонунга ҳукуматни шакллантиришда унинг ваколатларини чекловчи ўзгартиришларни маъқуллади. Аввалроқ президент ҳукуматни шакллантиришни сиёсий рақиби Миодраг Лекичга топширишга мажбур қиладиган ҳужжатнинг дастлабки вариантини имзолашдан бош тортганди. Ноябрь ойида бўлгани каби, бу мажлисда ҳам 81 депутатдан 41 нафари якуний қонун лойиҳаси учун овоз берди, конституцияга кўра, Жуканович қоннуни имзолаши керак.
Изоҳ (0)