Грузиядаги ҳукмрон “Грузия орзуси” партияси ва парламентда кўпчилик ўринга эга бошқа партиялар мамлакатда оммавий норозиликларга сабаб бўлган “Хорижий таъсирнинг шаффофлиги тўғрисида”ги қонун лойиҳасини қайтариб олишга қарор қилди.
“Қабул қилинган қонун лойиҳаси жамиятда баҳс-мунозараларга сабаб бўлганини кўриб турибмиз. Ёлғон машинаси қонун лойиҳасини салбий томондан талқин қилиб, аҳолининг маълум қисмини чалғитишга муваффақ бўлди. Қонун лойиҳасига “Россия қонуни” деган нотўғри тамға урилди ва унинг биринчи ўқишда қабул қилиниши жамоатчиликнинг бир қисми назарида Европа йўналишидан чекиниш сифатида кўрсатилди. Бундан ташқари, радикал кучлар ёшларнинг бир қисмини ноқонуний фаолиятга жалб қилишга муваффақ бўлди”, — дейилади томонларнинг қўшма баёнотида.
Грузияда “хорижий агентлар” тўғрисдаги қонун лойиҳаси ва намойишлар
Грузияда “хорижий агентлар” ҳақидаги қонун қабул қилинишига қарши оммавий норозилик намойишлари бир неча кундан бери давом этмоқда. Қонун лойиҳаси мамлакат парламентига икки вариантда киритилган. 7 март куни грузиялик депутатлар “Хорижий таъсирнинг шаффофлиги тўғрисида”ги қонун лойиҳасини биринчи ўқишда қабул қилди. Лойиҳада Грузияда “хорижий агентлар” реестрини яратиш кўзда тутилган бўлиб, унда 20 фоиздан ортиқ қисми чет элдан молиялаштириладиган барча нотижорий юридик шахслар ва оммавий ахборот воситалари рўйхати келтирилади.
“Хорижий агентлар тўғрисида”ги қонун лойиҳасининг иккинчи таҳрири – “Чет эл агентларини рўйхатга олиш тўғрисида”ги қонун лойиҳаси бўйича 9 март куни овоз бериш режалаштирилган эди. Мазкур лойиҳага кўра, хориждан маблағ олувчи ҳар қандай жисмоний ва юридик шахсларга “хорижий агент” мақоми берилиши мумкин.
7—8 март кунлари Тбилиси марказида Руставели проспектидаги парламент биноси яқинида оммавий норозилик намойишлари бўлиб ўтди, унда полиция иштирокчиларга қарши сув пуркагичлар ва кўзни ёшлатувчи газ ишлатган. Митинглар якунида Грузия Ички ишлар вазирлиги 133 кишининг майда безорилик ва полицияга бўйсунмаслик бўйича маъмурий моддалар бўйича ҳибсга олингани ҳақида хабар берди. Яна бир намойишчи полициячига ҳужум қилганликда айбланиб, ҳибсга олинган. У етти йилгача қамоқ жазосига ҳукм қилиниши мумкин.
Изоҳ (0)