Норматив-ҳуқуқий ҳужжатлар лойиҳалари муҳокамаси порталига Ўзбекистон Республикаси «Хусусий бандлик агентликлари тўғрисида»ги қонунига ўзгартириш ва қўшимчалар киритиш ҳақида»ги қонун лойиҳаси жамоатчилик муҳокамасига қўйилди.
Лойиҳага кўра, амалдаги қонуннинг 13-моддаси (Хусусий бандлик агентликларининг Ўзбекистон Республикасидан ташқаридаги ишни қидираётган шахсларни ишга жойлаштириш бўйича хизматлари) иккинчи қисми чет элда ишни қидираётган шахсларни ишга жойлаштириш бўйича кўрсатилган хизматлар учун тўловларни иш берувчи ёки буюртмачи ҳисобидан амалга ошириш тартибини назарда тутувчи янги хатбоши билан тўлдирилмоқда.
Шунингдек, киритилиши кутилаётган нормага кўра, Ўзбекистондан ташқаридаги ишни қидираётган шахсларни ишга жойлаштириш бўйича кўрсатилган хизматлар учун тўловлар ундириш тақиқланади.
Бундан ташқари, хусусий бандлик агентликларининг Бандлик ва меҳнат муносабатлари вазирлиги ҳузуридаги Хорижда меҳнат фаолиятини амалга оширувчи фуқароларни қўллаб-қувватлаш ҳамда уларнинг ҳуқуқ ва манфаатларини ҳимоя қилиш жамғармасида шакллантирадиган захира маблағлари миқдори эллик минг АҚШ долларидан базавий ҳисоблаш миқдорининг саккиз минг беш юз бараварига алмаштирилмоқда.
Қонуннинг 14-моддасига киритилаётган қўшимчага кўра, хусусий бандлик агентликлари ишга жойлаштириш соҳасида ахборот ва маслаҳат хизматлари кўрсатганлик учун мижозлардан базавий ҳисоблаш миқдорининг икки бараваридан ошмаган миқдорда ҳақ олиш мумкин бўлади.
Қонуннинг 15-моддаси янги қисми билан тўлдирилади ва Хусусий бандлик агентлиги томонидан хизматлар кўрсатиш тўғрисидаги шартнома Бандлик ва меҳнат муносабатлари вазирлигининг «labor-migration» дастурий мажмуасида реал вақт режимида рўйхатдан ўтказиладиган бўлади. Рўйхатдан ўтмаган шартнома ҳақиқий эмас деб топилишига сабаб бўлади.
Бандлик ва меҳнат муносабатлари вазирлигига яна бир ваколат тақдим этилмоқда. Унга кўра, вазирлик хусусий бандлик агентликлари фаолиятини тадбиркорлик субъектлари фаолиятини текширишларни мувофиқлаштириш бўйича ваколатли органни кейинчалик хабардор қилган ҳолда (молия-хўжалик фаолиятига аралашмасдан) текшириш ваколатига эга бўлади.
Текширишлар жараёнида вазирликнинг ваколатли вакиллари хусусий бандлик агентликларининг ҳудудлари ва биноларига монеликсиз кириш, ҳужжатлар билан танишиб чиқиш, улардан кўчирма нусхалар ҳамда масъул ходимлардан фаолиятга доир масалалар бўйича оғзаки ва ёзма тушунтиришлар олиш ҳуқуқига эга бўлади.
Бандлик ва меҳнат муносабатлари вазирлиги томонидан жойланган ушбу лойиҳа муҳокамаси шу йилнинг 24 мартига қадар давом этади.
Хусусий бандлик агентликлари билан боғлиқ вазият ҳақида
Ўзбекистонда хусусий бандлик агентликлари тўғрисидаги қонун 2018 йил октябрь ойида кучга кирган эди. 2019 йил кузидан бери Human, Korean and migrations ва бошқа хусусий бандлик агентликларининг раҳбарларига нисбатан фирибгарлик моддаси бўйича жиноят ишлари қўзғатилгани ҳақида хабарлар пайдо бўлди (маълумотларга кўра, саккизта агентликка қарши жиноят ишлари қўзғатилган).
Мавзуга доир: Ўзбекистондаги 30 та хусусий бандлик агентлиги бирорта ҳам фуқарони хорижга жўнатмагани маълум бўлди
Ўз навбатида, Бандлик ва меҳнат муносабатлари вазирлиги қонунга ўзбекистонликларни хорижда ишга жойлаштириш бўйича виждонсиз хизмат кўрсатилишидан ҳимоя қила оладиган тузатишларни киритиш ниятини билдирган эди.
2020 йилнинг 17 февраль куни Ўзбекистоннинг турли ҳудудларидан келган 100 га яқин одам Тошкентдаги Мустақиллик майдонида йиғилиб, Human агентлиги томонидан етказилган зарарнинг қоплаб берилишини талаб қилган эди. Улар билан дастлаб бош вазир ўринбосари Азиз Абдуҳакимов ҳамда бандлик ва меҳнат муносабатлари вазири Нозим Ҳусанов учрашди.
Кейинроқ норози фуқаролар билан Ўзбекистон бош вазири Абдулла Арипов ҳам учрашди. Учрашув якунларига кўра, ҳукумат раҳбари Human бандлик агентлиги томонидан фуқароларга етказилган 21 миллиард сўм (тахминан 2,2 миллион доллар) миқдоридаги зарарни вазирлик ҳузуридаги бюджетдан ташқари фонд ҳисобидан вақтинча қоплаб туриш ҳақида топшириқ берди.
Изоҳ (0)