Ўзбекистонда пенсионерлар томонидан талаб қилиб олинмаган пенсияларни тўлаш муддати икки баробарга узайтирилиши мумкин. Бу ҳақда 19 сентябрь куни Олий Мажлис Қонунчилик палатасида кўриб чиқилиб, депутатлар томонидан қабул қилинган қонун лойиҳасида кўзда тутилган.
Мажлисда “Ўзбекистон Республикасининг айрим қонунларига ногиронлиги бўлган шахсларнинг ижара муносабатларидаги ҳуқуқ ва эркинликларини янада мустаҳкамлаш ҳамда пенсияларни тайинлаш ва тўлаш тартибини такомиллаштиришга қаратилган ўзгартиришлар киритиш ҳақида”ги қонун лойиҳаси кўриб чиқилди.
Ушбу қонун лойиҳасида “Ижара тўғрисида”ги ва “Фуқароларнинг давлат пенсия таъминоти тўғрисида”ги қонунларига тегишли ўзгартишлар киритиш йўли билан аҳолининг ҳаёт даражасини янада юксалтириш ҳамда “Инсон қадри учун” тамойили асосида инсонларнинг фаровонлигини янада ошириш, шунингдек, ижтимоий ҳимоя қилиш дастурларининг самарадорлигини қайта кўриб чиқиш, халқаро стандартларга ва замон талабларига мувофиқлаштириш назарда тутилмоқда.
Жумладан, “Ижара тўғрисида”ги қонунининг 13-моддасидаги тегишли ўзгартиришга кўра ногиронлиги бўлган шахс деб ҳисобланган ижарачи амалдаги ижара шартномаси бўйича ўз мажбуриятларини бажаришни давом эттириш истагини билдирган тақдирда, шартноманинг амал қилиши тўхтатилмаслиги белгиланмоқда.
Амалдаги қонунчиликка кўра, пенсинерларга ҳисоблаб қўйилган, лекин улар томонидан талаб қилиб олинмаган пенсиялари мурожаат қилинган вақтдан олдинги 12 ой учун тўлаб берилади. Натижада пенсионерлар 12 ойдан кўп вақт республика ҳудудида бўлмаганда уларга ўн учинчи ва ундан олдинги ойлар учун пенсия тўланмайди.
Таклиф этилаётган қонун лойиҳаси билан 2024 йил 1 январдан бошлаб ҳисоблаб чиқарилган, лекин олинмаган пенсияларни тўлаш муддати икки баробарга яъни 12 ойдан 24 ойгача узайтирилмоқда. Шунингдек, пенсиялар миқдори йил давомида товарлар ва хизматларнинг истеъмол нархлари индекси даражасининг ўсиш суръатларини ҳисобга олган ҳолда ошириб борилишини, маҳкумлар озодликдан маҳрум қилинган даврларида амалга оширган фаолияти даврлари пенсия олиш ҳуқуқини берадиган фаолият тури сифатида белгиланишини назарда тутувчи ўзгартиришлар киритилиши назарда тутилмоқда.
Қизғин кечган баҳс-мунозаралардан сўнг, қонун лойиҳаси депутатлар томонидан қабул қилинди.
Изоҳ (0)