Олий Мажлис Қонунчилик палатасида Ўзбекистон қонун ҳужжатлари маълумотлари миллий базаси — «Lex.uz»га норматив-ҳуқуқий ҳужжатларни чоп этишнинг расмий манбаи мақомини беришга қаратилган қонун лойиҳаси муҳокамаси бўлиб ўтди. Қонун лойиҳаси фракциялараро қизғин баҳс-мунозарага сабаб бўлди, деб хабар берилади Қонунчилик Палатасининг расмий сайтида.
Йиғилишда сўзга чиққан депутатлар қабул қилинаётган норматив-ҳуқуқий ҳужжатларни барча аҳоли қатламларига кенг етказиш тизимини жорий этиш, унинг аниқ ташкилий-ҳуқуқий механизмларини тартибга солувчи қонунчилик ҳужжатларини ишлаб чиқиш ва қабул қилиш долзарб вазифа эканлигини таъкидлаб ўтди.
Тақдим этилаётган қонун лойиҳасининг бир қатор камчиликлари санаб ўтилди. Жумаладан, қонун лойиҳасининг электрон манба — «Қонун ҳужжатлари маълумотлари миллий базаси»да ҳужжатлар матнини уларни ҳатто босма нашрларда чоп этмасдан ҳам эълон қилишга йўл қўяди. Шундай қилиб, қонунчилик ҳужжатлари электрон шаклларидан судларда ишларни кўриб чиқишда фойдаланиш истиқболлари, томонлар «Қонун ҳужжатлари маълумотлари миллий базаси»да жойлаштирилган норматив-ҳуқуқий ҳужжатлар электрон версияларидан фойдаланганлигини исбот қилиш имкониятлари ноаниқ қолмоқда.
Қабул қилинган норматив-ҳуқуқий ҳужжатларни «Қонун ҳужжатлари маълумотлари миллий базаси»га киритилишида инсон омили тўлиқ эътиборга олинмаяпти — ҳужжатни электрон базага киритишда хато юзага келиши эҳтимоли мавжуд, деб таъкидланади материалда.
Шуларни инобатга олган ҳолда «Миллий тикланиш» ДП фракцияси депутатлари қонун лойиҳасининг «Қонун ҳужжатлари маълумотлари миллий базаси»га норматив-ҳуқуқий ҳужжатларни чоп этишнинг расмий манбаи мақомини бериш тўғрисидаги ғояни қўллаб-қувватлаб, шу билан бирга, қуйидагиларни таклиф этди:
— расмий босма нашрларда эълон қилинган норматив-ҳуқуқий ҳужжатларни «Қонун ҳужжатлари маълумотлари миллий базаси»га жойлаштириш мумкин, деб белгиловчи нормани «Норматив-ҳуқуқий ҳужжатлар тўғрисида»ги қонуннинг амалдаги матнига киритиш;
— қонунни юридик кучга кириши муддатини 12 ойдан 6 ойгача қисқартириш.
Изоҳ (0)