Франция Миллий Ассамблеяси бош вазир Мишел Барне раҳбарлигидаги ҳукуматга ишончсизлик вотуми учун овоз берди. Резолюцияни 557 нафар депутатдан 331 нафари қўллаб-қувватлади. Бу ҳақда Euronews хабар берди.
Ишончсизлик вотуми масаласини дастлаб “Янги халқ фронти” сўл коалицияси кўтарди, сўнгра бюджет лойиҳаси бўйича келишмовчиликлар туфайли ўта ўнг “Миллий бирлашма” ўз ташаббуси билан чиқди.
Мишел Барне ўз нутқида ҳукуматига ишончсизлик билдирилиши “жиддий оқибатларга” олиб келишини таъкидлади. Бош вазир французларнинг “харид қобилияти пасайиши” ва “янги полициячилар ҳамда ҳарбийларни ёллаш имконияти йўқолиши” ҳақида гапирди.
Эндликда президент Эммануэл Макрон Барне истеъфосини қабул қилишга мажбур бўлади, Францияни эса яна муваққат ҳукумат бошқаради. Шу билан бирга, қонун Барнени янги муддатга қайта сайлаш имконини беради.
Конституцияга кўра, президент июлда ўтказилган сўнгги сайловлардан бир йил ўтгандан кейингина навбатдан ташқари янги парламент сайловларини тайинлаши мумкин. Бу 1962 йилда Жорж Помпиду ҳукумати истеъфога чиқарилганидан бери иккинчи шунга ўхшаш ҳолат ҳисобланади.
Барненинг истеъфога чиқиши сабаби
Барчаси 2025 йил учун бюджетни келишиш жараёнида мамлакатдаги сиёсий кучлар ўртасидаги келишмовчиликлар туфайли бошланган. Бюджет тақчиллигини қисқартириш мақсадида Барне ҳукумати харажат моддаларини 40 миллиард еврога қисқартириш, шунингдек, йирик корпорациялар ва бой французлар учун солиқларни оширишни таклиф қилган — бу хазинага яна 20 миллиард евро келтириши керак эди.
Бироқ, унинг бир қатор таклифларига ўта ўнг “Миллий бирлашма” (РН) ишончсизлик вотуми билан таҳдид қилиб қарши чиқди. Барне бир қатор келишувларга эришганига қарамай, РН қонун лойиҳасининг якуний вариантини қаноатлантирмади.
Натижада Барне 2025 йилга мўлжалланган ижтимоий суғурта тизими бюджети тўғрисидаги қонунни ҳукумат таклиф этган кўринишда, парламентда муҳокама ва овоз беришсиз тасдиқлашга қарор қилди. Бунга Франция Конституциясининг 49.3-моддасида кўзда тутилган махсус тартиб ҳуқуқ беради.
Бироқ, ушбу тартиб қўлланилганда, Миллий мажлис депутатлари ҳукуматга ишонч масаласини овозга қўйиш ҳуқуқига эга бўлади ва айнан шундай бўлди ҳам.
Изоҳ (0)