Бугун, 11 декабрь куни бўлиб ўтган Олий Мажлис Қонунчилик палатасининг навбатдаги мажлисида Маъмурий жавобгарлик тўғрисидаги кодексга жамоат транспортидан фойдаланиш самарадорлигини оширишга қаратилган ўзгартириш ва қўшимчалар киритишни назарда тутувчи қонун лойиҳаси биринчи ўқишда кўриб чиқилди.
Қонун лойиҳасини Коррупцияга қарши курашиш ва суд масалалар қўмитаси биринчи ўқишга киритган. Ташаббускор Ички ишлар вазирилиги, лойиҳа бўйича вазирнинг ўринбосари Рамазон Ашрапов чиқиш қилди.
Вазир ўринбосарининг айтишича, таклиф этилаётган қонун лойиҳасини ишлаб чиқиш зарурати бугунги кунда қонунчиликда жамоат транспорти учун алоҳида ажратилган йўлакларда ҳаракатланган транспорт воситалари ҳайдовчилари учун жавобгарлик чоралари назарда тутилмаган. Натижада бошқа транспорт воситалари мазкур йўлакларда бемалол ҳаракатланиб, жамоат транспортининг ҳаракатига жиддий тўсқинлик қилмоқда.
Қонун лойиҳасига кўра, Маъмурий жавобгарлик тўғрисидаги кодекснинг янги 128 прим 7-моддасига киритилиб, жамоат транспорти учун алоҳида ажратилган йўлакларда ҳаракатланиш қоидаларини бузганлик учун жавобгарлик белгиламоқда. Хусусан, мазкур моддани биринчи қисмида ушбу қоида бузилишини биринчи марта содир этганлик учун БҲМнинг уч баравар миқдорида — 1 миллион 125 минг сўм жарима белгиламоқда. Иккинчи қисмида ушбу қоида бузилиш жазо қўллангандан кейин бир йил давомида такроран содир этилган бўлса, БҲМнинг беш баравар миқдорда — 1 миллион 875 минг сўм жарима белгиланмоқда. Учинчи қисмида, ёнида жойлашган жамоат транспорт учун алоҳида ажратилган йўлакни бўшатган ҳолда йўлни қатнов қисмида ўтаётган транспорт воситаларига йўл бермаслик БҲМнинг бир баравар миқдорида — 375 минг сўм жарима белгиламоқда.
Қонунчилик палатасининг спикери Нуриддин Исмоиловнинг айтишича, қонун лойиҳасидаги нормаларни ўрнини босувчи нормалар Маъмурий жавобгарлик тўғрисидаги кодексида бор.
Маъмурий жавобгарлик тўғрисидаги кодексда 128-модда бор — ҳайдовчиларнинг транспорт воситаларини пиёдалар йўлакларидан юриши, йўл белгилари ва йўл ҳаракатининг бошқа талаблари қоидаларига риоя этмаслиги учун жавобгарликни кўзда тутади. Агар жамоат транспорти учун жой ажратилса, уни белгиси бўлади ва белгига кириш мумкин эмас, деган тартиб бўлади. Демак, кириб қолса, унга жавобгарлик бор. Яна алоҳида жамоат транспорти учун алоҳида ажратилган йўлакларда ҳаракатланиш қоидаларини бузиш нормаси? Жамоат транспорти учун ажратилган йўлакларда ҳаракатланиш қоидаси борми? Умуман олганда транспорт ҳайдовчиси ҳамма нарсага алоҳида-алоҳида жавобгарлик бўляпти. Халқаро тажриба бошқачароқ, уларда яхши ишланган. Биз ҳар битта ҳаракатга жавобгарлик ўрнатаверсак қандай бўлади?, деди Нуриддин Исмоилов.
Спикернинг алоҳида таъкидлашича, жазо чоралари кучайтирилаверилса, сайловчилар “Сизлар қачонгача жазони ошираверасизлар?”, деган саволни ўртага ташлаши мумкин.
Изоҳ (0)