“Дарё” нашри 9 мартда Ўзбекистон ва жаҳонда содир бўлган энг муҳим воқеаларни эътиборингизга ҳавола этади.
Россиянинг аэробаллистик ракеталари Украина мудофаасини бузиб ўтмоқда
Россия кучлари Украина ҳудудини бир вақтнинг ўзида Shahed камикадзе дронларидан тортиб, деярли барча турдаги қанотли ракеталар билан ўққа тутди.
Украинанинг ҳаво ҳужумидан мудофаа тизимлари қанотли ракеталар ва дронлар зарбасини тўхтатган. Аммо ‘Кинжал’ типидаги аэробаллистик ракета инфратузилма объектига келиб тушган ва 7 соат давомида ҳаво ҳужумидан огоҳлантириш тизими ёқилган.
Украина қуролли кучлари ҳарбий-ҳаво кучлари спикери Юрий Игнат вазият ҳақида маълумот берар экан мамлакат ҳудудига учирилган Россиянинг Х-22, ‘Кинжал’ ва C-300 ракеталарини Украина армияси уриб тушира олмаслигини айтди. “Улар бизга хавф туғдирмоқда”, — деди у. Айни вазиятда Владимир Путин урушга нисбатан ўз амбицияларини ўзгартирмаган.
АҚШ Миллий разведкасидан Аврил Хейнснинг CNN’га берган интервьюсида эса Путин Украинага қарши йиллаб урушишга тайёр эканлиги ва бу йўл билан вақтни ўз фойдасига ҳал қилишга умид қилаётгани айтилган.
Украина Бахмутни ҳимоя қилишга қарор қилди
Ҳозирда Украина ҳукумати йирик шаҳарларга йўл очувчи Бахмут мудофаасини давом эттиришга қарор қилган. Чунки мамлакат Қуролли кучларининг чекиниши Россия ҳарбийларининг олдинга силжиб, Донбасснинг йирик шаҳарларини назоратга олишини таъминлайди дейди Украина президенти CNN билан суҳбатда.
Россия мудофаа вазири Сергей Шойгу сўзларига кўра, Россия қўшинлари томонидан шаҳарнинг назоратга олиниши “Украина Қуролли кучлари мудофааси учун кейинги ҳужум операцияларини” ўтказиш имконини беради.
CNN’нинг маълум қилишича, айрим украин командирлари ва офицерлари йўқотишлар фонида шаҳарни сақлаб қолиш мақсадга мувофиқлигига шубҳа билдирмоқда.
Бу ҳақда Зеленский: украиналик ҳарбийлар тинч аҳолининг кетишига ёрдам бериш учун шаҳарда қолишлари кераклигини ўзлари тушуниб турибди” дея изоҳ берди.
Грузияда оммавий норозилик намойишлари: хориждан маблағ олувчилар рўйхати нима учун тузилади
Грузияда “хорижий агентлар” ҳақидаги қонун лойиҳасига қарши оммавий норозиликлар бир неча кундан бери давом этмоқда. 7 мартда қабул қилинган қонун хориждан маблағ оладиган жисмоний ва юридик шахслар рўйхатини шакллантириши ва ёки уларга хорижий агент мақомини бериши мумкин эди.
Ҳозирда мамлакатдаги ҳукмрон партиялар норозиликлар фонида қонун лойиҳасини қайтариб олди.
“Қабул қилинган қонун лойиҳаси жамиятда баҳс-мунозараларга сабаб бўлганини кўриб турибмиз. Бу лойиҳага “Россия қонуни” деган нотўғри тамға урилди ва унинг биринчи ўқишда қабул қилиниши жамоатчиликнинг бир қисми назарида Европа йўналишидан чекиниш сифатида кўрсатилди”, — дейилади томонларнинг қўшма баёнотида.
Ўзбекистонда қайси лавозимдаги шахсларнинг икки муддатдан ортиқ вақтга сайланиши тақиқланмода? Конституциявий қонун лойиҳаси муҳокамада
Ўзбекистон Конституция лойиҳасида давлат ҳокимиятининг бир қатор лавозимларидаги шахслар икки муддатдан ортиқ вақтга тайинланиши тақиқланмоқда.
Қайд этилишича, Конституция лойиҳасида давлат ҳокимиятининг бир қатор лавозимларига нисбатан айни бир шахс сурункасига икки муддатдан ортиқ ушбу лавозимга сайланиши (тайинланиши) мумкин эмаслигига оид демократик қоида киритилмоқда.
Унга кўра, қуйидаги лавозимларга бир шахс икки мартадан ортиқ сайланиши мумкин эмас:
- Қонунчилик палатаси спикери;
- Сенат раиси;
- Ўзбекистон Республикасининг президенти;
- вилоят, туман, шаҳар халқ депутатлари кенгашининг раиси;
ҳоким; - Олий суднинг раиси ва раис ўринбосари;
- Судьялар олий кенгашининг раиси ва раис ўринбосари;
- Марказий сайлов комиссиянинг раиси;
- Бош прокурор.
Олий Мажлис Қонунчилик палатасида 9 март, яъни бугун бўлиб ўтадиган ялпи мажлисда депутатлар референдум ўтказиш ҳақида қарор қабул қилиши кутилмоқда. Ушбу мажлисда Конституциявий қонун лойиҳаси кўриб чиқилади.
Изоҳ (0)