Xonanda, raqqosa va qo‘shiqlar muallifi Britni Spirs o‘zining ijtimoiy tarmoqdagi sahifasida Amerika Qo‘shma Shtatlarini tark etib, Meksikaga ko‘chib o‘tganini ma’lum qildi. Uning so‘zlariga ko‘ra, qo‘shiqchi paparatssilarning doimiy e’tibori va ta’qibidan juda charchagan. Shu sababli boshqa davlatga ko‘chib ketishga majbur bo‘lgan.
Spirs AQSHning ko‘plab tabloidlarda chop etilayotgan fotosuratlari haqiqatdan ancha yiroqligini hamda sariq matbuotlar uning qiyofasini atayin noxush ko‘rinishda tasvirlayotganidan ranjigan.
“Bunday suratlar mening obro‘yim va obrazimga putur yetkazmoqda, qolaversa, yuragimga qattiq botmoqda. Ular mening yuzimni dahshatli ko‘rinishda chop etishadi, bu suratlarda men hatto o‘zimga ham o‘xshamayman”, deydi 2000-yillarning pop yulduzi.
Britnining aytishicha, bunday xunuk holatga chidash xonanda uchun og‘ir bo‘lgan va oxir-oqibat uning sabr kosasi to‘lgan:
“Ha, men mukammal ko‘rinishdagi ayol emasman, lekin atrofimizda juda ko‘p shafqatsiz insonlar uchrab turadi” deydi Spirs.
Xonanda yaqinda sobiq turmush o‘rtog‘i, fitnes trener Sem Asgari bilan ajrashdi. Nikohni rasman bekor qilish jarayoni Britni Spirsning tug‘ilgan kunida — 2-dekabrda bo‘lib o‘tdi.
Ma’lumot uchun, “Baby One More Time”, “Toxic”, “Everytime”, “Stronger” va ko‘plab hit qo‘shiqlar muallifi Britni Spirs faoliyati davomida 36 ta mukofot va 87 ta nominatsiyaga ega bo‘lgan. Qo‘shiqchi Forbes jurnali ma’lumotlariga ko‘ra dunyoning 100 ta eng nufuzli va mashhur insonlari ro‘yxatida 6-o‘rinni egallagan, 2010-yilda o‘n yillikning eng ko‘p albomi sotilgan xonanda va dunyodagi uchinchi eng nufuzli musiqachisiga aylangan. Faoliyati davomida 9 ta studiya albomini chiqarib, 30 milliondan ortiq plastinkasini sotishga muvaffaq bo‘lgan. U “Gremmi”, AMA, Billboard Music Awards, MTV Video Music Awards va Nick Teen Choice Awards kabi mukofotlarini qo‘lga kiritgan.
Izoh (0)