АҚШнинг Техас штатида хизмат қилган 22 ёшли америкалик ҳарбий Taylor Адам Ли Россияга мудофаага оид махфий сирларни етказишга уринганликда гумонланиб, 6 август куни ҳибсга олинди. Бу ҳақда Fox News хабар берди.
АҚШ Адлия вазирлигига кўра, у июнь ойида Россия фуқаролигини олиш эвазига “М1А2 Абрамс” жанговар танки ва бошқа ҳарбий техникаларга оид қимматли маълумотларни русларга тақдим этган. Taylor Адам Ли Қўшма Штатларнинг Эль-Пасо шаҳридаги Форт Bliss ҳарбий базасида хизмат қилган ва мудофаага доир ўта махфий маълумотлардан хабардор бўлган.
“АҚШ мамлакатнинг заиф томонларини фош қилганим учун мендан хурсанд эмас. Ҳозир Россияда бўлганимда, қўлимдан келганча ёрдамимни аямасдим”, деган Ли.
Июль ойида у ўзини Россия ҳукумати вакили деб таништирган шахс билан шахсан учрашиб, унга СД-карта берган. Унда ҳам “Абрамс” танки, бошқа зирҳли техникалар ва жанговар амалиётларга оид ҳужжатлар бўлган. Айрим маълумотлар “назорат остидаги ахборот” сифатида белгиланган бўлиб, уларнинг тарқатилиши ман қилинган эди.
Шунингдек, Ли “Абрамс” танки ичидаги муҳим техник ускунани ҳам Россияга етказмоқчи бўлган. У 31 июль куни Эль-Пасодаги омборга ушбу ускуна деб гумон қилинаётган нарсани топширган ва кейинчалик россиялик шахсга хабар юборган: “Вазифа бажарилди”. ФҚБнинг қарши разведка бўлими директори ёрдамчиси Роман Рожавский бу воқеага шундай муносабат билдирган:
“Бу — АҚШга хиёнат қилишни ўйлаётган ҳар қандай шахсга, айниқса, Ватанга содиқлик қасамёдини қилган ҳарбийларга огоҳлантирувчи сигнал”.
Изоҳ (0)