Universal Pictures кино компанияси хонанда Бритни Спирснинг “Мендаги аёл” (“Тhe woman in me”) ҳаёт хотиралари ҳақидаги китоби асосида фильм суратга олиш ҳуқуқини қўлга киритди.
2023 йил 24 октябрда чоп этилган “Мендаги аёл” китоби бир зумда ўқувчилар ва танқидчиларнинг олқишига сазовор бўлди ва бестселлер асарга айланди. Китоб биргина Қўшма Штатларда 2,5 миллион нусхадан кўпроқ сотилди. Ушбу мемуар асосида фильм яратиш учун йирик кино компаниялар орасида катта рақобат бўлиб ўтди ва натижада Universal Pictures китобни экранлаштириш ҳуқуқини сотиб олди.
Биографик фильм режиссёри Жон Чу, продюсери Марк Платт бўлиб, у “Ла Ла Ленд”, “Вавилон” каби фильмлари билан танилган. Спирс Х тармоғида (собиқ Twitter) хонанданинг энг яхши кўрган фильмлари муаллифи Платт билан янги ва сирли лойиҳа” устида ишлаётганини маълум қилган эди.
Бритни Спирс китобида ҳаётида бўлиб ўтган оғир дамлар ва аччиқ хотиралари ҳақида очиқ-ойдин сўзлаб берган эди. Асарда поп юлдузнинг оиласи, шахсий ҳаёти, зиддиятли ўтган болалиги, Жастин Тимберлейк билан муносабатлари ва унинг босими остида 19 ёшида аборт қилдиришга мажбур бўлгани, Кевин Федерлайн билан никоҳи, отасининг васийлиги учун курашиши каби кўплаб воқеалар ёритилган. Шунингдек, ўқувчи асар орқали шоу-бизнесдаги карьеранинг турли қирралари ва саҳна ортидаги ҳаётга бошқа томондан қараш имкониятига эга бўлади.
Изоҳ (0)