Лос-Анжелес Олий судида америкалик поп-юлдуз Бритни Спирс ва унинг отаси Жейми Спирс ўртасидаги васийлик иши бўйича бўлиб ўтган ҳуқуқий баҳслар ўз ниҳоясига етди. Бу ҳақда “Правила жизни” нашри хабар бермоқда. Судда адвокатлар иш ҳақини тўлаш ва хонандани отаси томондан молиявий бошқариш масаласи кўриб чиқилди.
Бритни Спирс адвокати Мэтью Розенгартнинг айтишича, хонанда ва ниҳоят тўлиқ эркинликка эришди. Эндиликда поп-юлдуз орзу қилганидек васийлик ва молиявий эркинлик масалалари бўйича ҳуқуқий муаммоларга дуч келмайди.
Спирс хоним ҳар доим илҳом берувчи юлдуз ва ўзига хос эпик тарихга эга жасур хонанда бўлиб қолади. Васийлик 2021 йил ноябрь ойида олиб ташланганига қарамай, унинг озодликка бўлган истаги айнан бугун тўлиқ амалга ошди, — дейди унинг адвокати.
Тhе New York Times қайд этишича, ота ва фарзанд ўртасидаги низони ҳал этиш шартлари маълум қилинмаган. Бироқ TMZ нашри маълумотларига кўра, Бритни Спирс суд ишида мағлуб бўлди ва эндиликда у суд харажатларини тўлашга мажбур. Манбаларга кўра, қўшиқчи нафақат ўз пулларини қайтара олмайди, бунинг устига отаси Жеймининг 2 миллион доллардан ортиқ суд тўловларини ҳам қоплашга мажбур бўлади.
Бўлиб ўтган ишлардан Бритни албатта ўта ғазабланган, чунки мазкур судда ютиб чиқиш учун хонанда ўз адвокатига тахминан 4 миллион доллар сарфлаган. Афсуски, Бритнининг отаси бундан аввал йиллар давомида васий сифатидаги ваколатларини суиистеъмол қилган.
Маълумот учун: Бритни Спирс 2008 йилда унинг руҳий саломатлиги билан боғлиқ оммавий жанжаллардан кейин отасининг васийлигига олинган. Жейми Спирс қизи ҳаётининг деярли барча соҳаларини назорат қилган. 2020 йилда қўшиқчи васийликка қарши чиқишга ҳаракат қилди ва август ойида Жейми Спирс қизининг васийлик ҳуқуқини бекор қилишга рози бўлди. 2021 йил 12 ноябрда Лос-Анжелесдаги суд ниҳоят Жейми Спирсни 13 йил давом этган васийликдан олиб ташлади.
Изоҳ (0)