Қирғизистон президенти Садир Жапаров таркибида никотин бўлган электрон сигареталарни олиб кириш, муомалага киритиш ва улардан фойдаланишни тақиқловчи қонунни имзолади. Бу ҳақда Kabar хабар берди.
Жўқорғи Кенеш томонидан 23 октябрда қабул қилинган ҳужжат фуқароларнинг соғлиғини тамаки маҳсулотларини истеъмол қилишнинг салбий оқибатларидан ҳимоя қилишга қаратилган. Қонунга асосан тақиқни бузувчилар сезиларли миқдорда жаримага тортилади.
Жисмоний шахслар учун электрон сигареталардан фойдаланганлик 100, уларни сотганлик учун 200 ҳисоблаш кўрсаткичи (115 ва 231 доллар)миқдорида жарима белгиланган. Юридик шахслар учун жарима миқдори юқорироқ бўлиб, мос равишда 600 ва 650 ҳисоблаш кўрсаткичини (60-65 минг сом — 693-751 доллар) ташкил этади.
Электрон сигареталарни ноқонуний олиб кирганлар ҳам жиноий жавобгарликка тортилади. Маълум миқдорда олиб кириш бир йилгача ахлоқ тузатиш ишлари ёки 1200 гача ҳисоблаш кўрсаткичи (20 минг сом — 1387 доллар) миқдорида жаримага сабаб бўлади. Катта ва йирик ҳажмларда эса жарима 2 минг ҳисоблаш кўрсаткичигача (200 минг сом — 2312 доллар) оширилади, жазо эса икки йилгача озодликдан маҳрум қилишни ўз ичига олиши мумкин. Ҳужжат 2025 йил 1 июлдан кучга киради.
Қозоғистонда ҳам вейплар сотиш тақиқланган
Апрель ойида президент Қосим-Жўмарт Тўқаев вейпларни мамлакатга олиб кириш, ишлаб чиқариш ва сотишни тақиқлашни назарда тутувчи қонунни имзолади.
Электрон истеъмол тизимларини (вейп) олиб кириш ва ишлаб чиқариш 2000 ойлик ҳисоб кўрсаткичи (16,5 минг доллар)гача жарима, икки йилгача озодликни чеклаш ёки худди шу муддатга озодликдан маҳрум қилиш билан жазоланади. Қонун, шунингдек, чекилмайдиган тамаки маҳсулотлари, вейплар, ароматизаторлар ва улар учун суюқликларни реклама қилишни тақиқлайди.
Изоҳ (0)