Қирғизистонлик амалдорнинг умумий чегара масалалари бўйича баёнотларини муҳокама қилиш учун 16 сентябрь куни Тожикистон ҳукумати Қирғизистоннинг фавқулодда ва мухтор элчиси Эрлан Абдилдаевни Ташқи ишлар вазирлигига таклиф қилди. Бу ҳақда Тожикистон ТИВ матбуот хизмати хабар берди.
Хабарда айтилишича, элчига Тожикистон томонининг 15 сентябрь куни “Қирғизистон олий амалдори”нинг тожик-қирғиз чегараси масалалари бўйича ахборот майдонида берган баёнотлари юзасидан хавотирлари ҳақида маълум қилинган.
“Бундай мулоҳазалар тожик-қирғиз чегарасини делимитация ва демаркация қилиш бўйича музокаралар жараёнининг боришига жиддий зарар етказиши ҳамда ўзаро ишончсизликка олиб келиши таъкидланди”, — деди дипломатик департамент матбуот хизмати.
Ташқи ишлар вазирлиги “юқори мартабали амалдор”нинг исмини айтмади, аммо гап Қирғизистон бош вазири ўринбосари ва республика Миллий хавфсизлик давлат қўмитаси раиси Қамчибек Ташиев ҳақида кетаётган бўлиши мумкин. 15 сентябрь куни Ташиев Тожикистон ҳукуматини ҳудудий даъволардан воз кечишга чақирганди.
“Биз яқинда янги ҳужжатларни топдик, унга кўра кўплаб қирғиз ерлари Тожикистонга ўтказилган. Буни тарихий ва ҳуқуқий ҳужжатлар билан исботлашимиз мумкин. Агар қўшни давлат ҳудудий даъволаридан воз кечмаса, биз ҳам шундай қиламиз. Бунинг учун бизда етарли куч ва имкониятлар бор”, — деган Миллий хавфсизлик давлат қўмитаси раҳбари.
Ташиев бу ҳақда 2022 йил 15—16 сентябрь кунлари Боткен вилоятида юз берган чегара можаросининг бир йиллиги муносабати билан баёнот берди. У тўқнашувларга чегара билан боғлиқ ҳал этилмаган муаммолар сабаб бўлганини тушунтириб, Қирғизистонга “қўшни давлат ҳужум қилганини” қўшимча қилди.
Тожикистон — Қирғизистон чегарасининг узунлиги 976 километр бўлиб, шундан атиги 664 километри делимитация ва демаркация қилинган. Баҳсли ҳудудларда икки давлат аҳолиси ўртасида йўллар, сув ва ердан фойдаланиш бўйича мунтазам келишмовчиликлар чиқади. Охирги қуролли можаро 2022 йил сентябрда юз берди: умумий чегаранинг бир неча участкаларида отишмалар бошланди. Бир неча кун давом этган тўқнашувларда ҳар икки томондан кўплаб қурбонлар ва ярадорлар бўлди. Икки республика ҳукумати бир-бирини қуролли босқинчиликда айблади.
Изоҳ (0)