Қирғизистон президенти Садир Жапаров “Кабар”га берган интервьюсида Тожикистон билан чегарани делимитация ва демаркация қилиш масаласига тўхталди.
“Олдинги силжишлар бор, лекин бу иш жуда секин кетмоқда. Агар иккала томон делимитацияга рози бўлса, унда бир ойлик иш қолади. Афсуски, иш жараёнида қўшнилар тўсатдан 1924 йил харитага асосан ҳудудни белгилашни таклиф қилмоқда.
Иш жараёни тўхтайди. Бундай таклиф ҳеч қандай ҳуқуқий ва ахлоқий меъёрларга жавоб бермайди. 1924 йилда Тожикистон ҳам, биз ҳам алоҳида давлат эмасдик. Агар иккала томон 1924 йилги харита асосида чегараланишга қарор қилса, у ҳолда барча чегара чизиқлари кўриб чиқилиши керак”, — деди Жапаров.
Қирғизистон раҳбари аввалроқ Тожикистон билан чегара чизиғини аниқлаш 2023 йилнинг майигача якунланишига умид қилганини айтди.
“Ўша пайтда томонлар ҳамжиҳатликда ишлаган, иш тезроқ кечганди. Афсуски, у якунланмади”, — дея хулоса қилди у.
Изоҳ (0)