Қирғизистон президенти Садир Жапаров 11 декабрь куни Боткен вилояти аҳолиси билан учрашувда Тожикистон билан чегараларни делимитация ва демаркация қилиш масаласига изоҳ берди. Бу ҳақда “КактусМедиа” хабар берди.
“Аслида икки давлат билан чегарадош Боткен вилояти алоҳида стратегик ҳудуд бўлгани боис бу ерда аҳолининг доимий яшаши учун қулай шароитлар яратилган. Биз минтақа хавфсизлигини таъминлаш мамлакат учун алоҳида аҳамиятга эга эканини яхши биламиз. Ўзингизга маълумки, чегара масаласини дипломатик йўллар билан ҳал қилишга ҳаракат қилмоқдамиз.
Чегараларни делимитация ва демаркация қилиш бўйича ҳукуматлараро комиссия ҳам доимий иш олиб бормоқда. Умид қиламизки, чегараларимиз ҳал бўладиган, Марказий Осиёда тинчлик ҳукм сурадиган кун келади. Ўйлайманки, баҳоргача бу масалани ҳал қиламиз. Энг муҳими, мустақил юртимиз, адолат байроғини кўтарган халқимиз, чуқур тарихга эгамиз”, — деди Қирғизистон президенти.
Шунингдек, Жапаров тинчлик ва ҳамжиҳатликда яшашни, чегара бўйича музокаралар аллақачон якунланаётганини айтди. Сиёсатчи аслида чегара масаласи янги йилгача ҳал бўлиши керак бўлгани, аммо улгуришмагани сабабли баҳоргача ҳал бўлишини билдирди.
Изоҳ (0)