Қирғизистон Миллий хавфсизлик давлат қўмитаси раҳбари Қамчибек Ташиев Тожикистон ҳукуматини ҳудудий даъволардан воз кечишга чақирди. Бу ҳақда 24.кг хабар берди.
Ташиев Боткенда 2022 йилнинг 15—16 сентябрь кунлари чегарада содир бўлган фожианинг бир йиллиги эканини айтди.
“Ўнлаб ҳарбий хизматчилар ва тинч аҳоли ҳалок бўлди. Бунга чегара муаммоларининг ҳал этилмагани ва қўшни давлатнинг давлатимизга ҳужум қилиши сабаб бўлган. Мен давлат чегарасини демаркация ва делимитация комиссияси раисиман. Бугунгача муаммони тинч йўл билан ҳал қилишга ҳаракат қилдик ва буни давом эттирамиз.
Давлатимиз раҳбари муаммоларни музокаралар йўли билан ҳал қилишга кўрсатма бермоқда. Лекин, шу билан бирга, айтиш керакки, ўтган йили, ҳақиқатан, давлатимизга нисбатан агрессия акти содир этилган. Келажакда бундай агрессияга йўл қўймаймиз”, — деди Ташиэв.
Унинг сўзларига кўра, аввалроқ қўшни республика Қирғизистонга қарши ҳудудий даъволар билан чиққан.
“Ҳеч қандай шикоят бўлмаслиги керак, деб жавоб бердик. Яқинда биз янги ҳужжатларни топдик. Уларга асосан биз кўплаб қирғиз ерлари Тожикистонга ўтганини биламиз. Буни тарихий ва ҳуқуқий ҳужжатлар билан исботлашимиз мумкин.
Агар қўшни давлат ўз ҳудудий даъволаридан воз кечмаса, биз ҳам даъво билан чиқамиз. Бунинг учун куч ва имкониятларимиз етарли. Ўнлаб, ҳатто юзлаб йиллар аввал Тожикистонга ўтган ерларни қайтариш имкониятимиз бор”, — деди Миллий хавфсизлик давлат қўмитаси раҳбари.
2022 йил 16 сентябрь куни қирғиз-тожик чегарасининг бир қанча участкаларида отишма содир бўлди. Лайлак ва Боткен вилоятларидаги аҳоли пунктлари ўққа тутилди. Юзлаб қирғизистонликлар яраланди, 63 киши ҳалок бўлди. Улар орасида ҳарбийлар ҳам бўлган.
Изоҳ (0)